Mumbai Crime : मुंबईत अनेक घरे; २०० पेक्षा जास्त चेले; बांगलादेशी किन्नरजवळ सापडलं कोट्यवधींचं घबाड

मयूर राणे, साम टीव्ही

Mumbai : मुंबईच्या गोवंडी भागात ज्योती माँ म्हणून नाव बदलून राहणाऱ्या बांगलादेशी बाबू आयनल खान या ४४ वर्षीय किन्नर गुरुला शिवाजी नगर पोलिसांनी अटक केली आहे.तिची मोठी प्रॉपर्टी आणि घरे मुंबई उपनगरात असल्याचे समोर येत आहे.

२०० पेक्षा जास्त चेले असलेला बाबू खान किन्नरांचा गुरु म्हणून गोवंडी मध्ये वास्तवास होती. मात्र काही दिवसांपूर्वी आठ बांगलादेशीना पोलिसांनी अटक केल्यावर त्यांना भारतात आणून त्यांना इथे राहण्यास तिने मदत केली होती. तसेच काही तक्रारदारांनी देखील याची माहिती पोलिसांना दिल्यावर शिवाजी नगर पोलिसांनी या किन्नर माँला ताब्यात घेतले.

या किन्नरची कागदपत्र तपासली असता तिचे जन्म प्रमाणपत्र बोगस असल्याचे समोर आले. त्यानंतर पोलिसांनी तिला अटक केली. तिची रवानगी न्यायालयीन कोठडीत करण्यात आली आहे.तिच्याकडे अनेक घरे आणि प्रॉपर्टी असल्याचे समोर येत आहे. अपहरण , मारामाऱ्या असे गंभीर गुन्हे ही दाखल आहेत. शिवाजी नगर पोलीस याचा पुढील तपास करीत आहे.

किन्नर ज्योतीचा मुंबईच्या गोवंडी,रफीकनगर,कुर्ला, देवनार, नारपोली आणि ट्रॉम्बे या भागात अधिक वावर असायचा. मागील ३० वर्षांपासून किन्नर ज्योती ओळख लपवून राहत होती. तिने बोगस आधार, पॅन कार्ड आणि इतर कागदपत्रे तयार केले होते. बनावट कागदपत्रांचा वापर करून भारतात राहणाऱ्या किन्नर ज्योतीच्या मुसक्या आवळल्या आहेत. मुंबईत २० हून अधिक घरे असलेल्या ज्योती किन्नरची मालमत्ता कोटींच्या घरात जाते.