कोळसा खाणीत भीषण स्फोट; 10 मजुरांचा मृत्यू, अनेकांच्या संसाराची राखरांगोळी

मेघालयातील ताशखाई भागातील एका कोळशाच्या खाणीत भीषण स्फोट झाल्याची घटना घडली आहे. या स्फोटात कमीत कमी १० मजुरांचा मृत्यू झाल्याची माहिती समोर आली आहे. या स्फोटाने परिसरात एकच खळबळ उडाली. घटनेची माहिती मिळताच पोलिसांनी घटनास्थळी धाव घेतली.

मिळालेल्या माहितीनुसार, ताशखाईच्या कोळसा खाणीत अचानक मोठा स्फोट झाला. या स्फोटावेळी खाणीत १० हून अधिक मजूर काम करत होते. स्फोट झाल्यानंतर मजुरांना बाहेर काढण्याआधी काहींची प्राणज्योत मालवली. बहुतांश मृत मजूर आसाममधील होते, असा दावा करण्यात येत आहे. परंतु प्रशासनाने याबाबत दुजोरा दिलेला नाही.

स्थानिक सूत्रांनी दिलेल्या माहितीनुसार, मृत मजुरांपैकी एक मजूर आसामच्या कटिगारा भागातील बिहारा गावात राहणारा होता. खाणीत स्फोट झाल्याची माहिती मिळताच पोलीस आणि बचाव पथक मदतीला धावलं. खाणीत आणखी कोणी अडकलं आहे का, याचा तपास सर्च ऑपरेशनच्या माध्यमातून करण्यात येत आहे.

प्रशासनाने कोळसा खाणीला वेढा घातला आहे. कोळसा खाणीत नेमका स्फोट कसा झाला, याचा तपास करण्यात येत आहे. प्राथमिक माहितीनुसार, खाणीत गॅस गळतीमुळे स्फोट झाल्याची शक्यता व्यक्त केली जात आहे. तपासानंतर नेमका कशामुळे स्फोट झाला, हे स्पष्ट होणार आहे.

स्फोटानंतर मजुरांची सुरक्षा आणि अनधिकृत खाणीचा मुद्दा ऐरणीवर आला आहे. या स्फोटाचा तपास करून दोषींवर कठोर कारवाई केली जाईल, असं आश्वासन प्रशासनाने दिलं आहे. मृतांच्या नातेवाईकांना आर्थिक मदतीचे आश्वासन प्रशासनाने दिले आहे. खाणीत १० मजुरांच्या मृत्यूने त्यांच्या कुटुंबावर दु:खाचा डोंगर कोसळला आहे. स्फोटामुळे अनेकांच्या संसाराची राखरांगोळी झाली आहे.