माजी मुख्यमंत्र्यांना मोठा धक्का; निकटवर्तीय महिला नेत्याने दिला पक्षाच्या पदाचा राजीनामा

पश्चिम बंगाल विधानसभा निवडणुकीत पराभव झाल्यानंतर ममता बॅनर्जी यांच्या अडचणी दिवसेंदिवस अडचणी वाढताना दिसत आहेत. ममता बॅनर्जी यांच्या जवळच्या मानल्या जाणाऱ्या खासदार काकोली घोष दस्तीदार यांनी पक्षाच्या जिल्हाध्यक्ष पदाचा राजीनामा दिला आहे. तृणमूल काँग्रेसच्या बारासात संघटना जिल्हाध्यक्षपदाचा राजीनामा दिल्याचे समोर आलं आहे.

काकोली घोष दस्तीदार या चार वेळा तृ्णमूल काँग्रेसच्या खासदार राहिल्या आहेत. त्यांनी अचानक पक्षातील पदाचा राजीनामा दिल्याने राजकीय वर्तुळात चर्चांना उधाण आलं आहे. विधानसभा निवडणुकीत पक्षाने जिल्हा पातळीवर खराब कामगिरी केली. विधानसभा निवडणुकीत पक्षाच्या उमेदवाराच्या पराभवाची नैतिक जबाबदारी स्वीकारत त्यांनी जिल्हाध्यक्षपदाचा राजीनामा दिला.

विधानसभा निवडणुकीनंतर तृणमूल काँग्रेसच्या नेत्यांनी जुन्या कार्यकर्त्यांना अधिक महत्व देण्याची मागणी केली आहे. तसेच त्यांनी पक्षाची प्रतिमा सुधारण्याचा सल्ला दिला आहे.

काकोली घोष दस्तीदार यांना लोकसभेच्या मुख्य दक्षता अधिकारी पदावरून हटवण्यात आलं आहे. त्यानंतर त्यांनी सोशल मीडियावर पोस्ट नाराजी व्यक्त केली होती. 'आज मला चार दशकांच्या प्रामाणिकपणाचे फळ मिळालंय, अशी त्यांनी पोस्ट केली होती. दुसरीकडे काकोली यांनी रविवारी पत्रकार परिषद घेऊन उत्तर २४ परगणा जिल्हाध्यक्षपदाचा राजीनाम्याची घोषणा केली.

काकोली यांच्या राजीनाम्यावर भाष्य करताना तृणमूलचे आमदार कुणाल घोष यांनी म्हटलं की, ही पक्षातील अंतर्गत प्रकरण आहे. त्यांनी राजीनामा दिला की नाही, यावर कोणतीही प्रतिक्रिया आता देणार नाही. जेव्हा पक्ष सांगेल, तेव्हा प्रतिक्रिया देईल'.