Shocking : बहीण-भावाच्या नात्याला काळिमा; घरात एकट्या असलेल्या १८ वर्षीय बहिणीवर चुलत भावानं केला बलात्कार

Madhya Pradesh Rape Case Crime News मध्य प्रदेशातील खांडवा जिल्ह्यातील पिपलोड पोलीस ठाण्याच्या हद्दीत नात्याला काळिमा फासणारी घटना समोर आली आहे. एका १८ वर्षीय तरुणीवर तिच्याच ३० वर्षीय चुलत भावाने बलात्कार केल्याची संतापजनक घटना घडली आहे. पीडितेच्या तक्रारीनंतर पोलिसांनी आरोपीविरुद्ध गुन्हा दाखल केला असून त्याचा शोध सुरू केला आहे.

मिळालेल्या माहितीनुसार, पीडित तरुणीची आई काही कामानिमित्त इंदूर येथे गेली होती. पीडित तरुणी आणि तिचा चुलत भाऊ यावेळेस घरात एकटेचं होते. त्यावेळी घरात ती एकटी असल्याचा फायदा घेत आरोपीने तिच्यावर जबरदस्ती बलात्कार केला. या घटनेनंतरही आरोपीकडून तिचा शारीरिक आणि मानसिक छळ सुरू राहिल्याचा आरोप तिने केला आहे. मात्र, कुटुंबाच्या बदनामीमुळे तरुणी गप्प राहिली.

काही दिवसानंतर तरुणीने घडलेला सगळा प्रकार आईला सांगितला. मुलीकडून ही माहिती मिळताच आईला मोठा धक्का बसला. त्यानंतर कुटुंबीयांनी तातडीने पिपलोड पोलीस ठाणे गाठून तक्रार नोंदवली. तरुणीच्या जबाबाच्या आधारे पोलिसांनी आरोपीविरुद्ध बलात्कारासह विविध संबंधित कलमांखाली गुन्हा दाखल केला आहे. तसेच पीडितेची वैद्यकीय तपासणीही करण्यात आली असून तपासाची प्रक्रिया सुरू आहे.

दरम्यान, तक्रार दाखल झाल्यानंतर आरोपी फरार झाल्याची माहिती पोलिसांनी दिली आहे. त्याचा शोध घेण्यासाठी विविध ठिकाणी छापेमारी करण्यात येत असून लवकरच त्याला अटक करण्यात येईल, असे पोलिसांनी म्हटले. या घटनेमुळे परिसरात खळबळ उडाली आहे. पोलिसांनी प्रकरणाचा सखोल तपास सुरु केला आहे.