... LIC कडून अदानी समूहाला ३३००० कोटी? वॉशिंग्टन पोस्टच्या वृत्तात खळबळजनक दावा, VIDEO

अमेरिकेतील वृत्तपत्र वॉशिंग्टन पोस्टने अदानी समूहावर गंभीर आरोप केला आहे. भारतीय आयुर्विमा महामंडळ (LIC) ने सरकारी अधिकाऱ्यांच्या प्रस्तावानुसार अदानी समूहाच्या कंपनीत जवळपास ३३००० कोटी रुपयांची गुतंवणूक केल्याचा दावा 'वॉशिंग्टन पोस्ट' या वृत्तपत्रात करण्यात आला आहे. दुसरीकडे 'वॉशिंग्टन पोस्ट' या वृत्तपत्रात केलेले दावे अदानी समूहाने फेटाळून लावले आहेत.

रिपोर्टनुसार, 'वॉशिंग्टन पोस्ट' या वृत्तपत्रात दावा करण्यात आला आहे की, 'सरकारच्या दबावात एक योजना आखण्यात आली. त्यानंतर योजनेला संमती देण्यात आली. या आरोपानंतर काँग्रेसची पहिली प्रतिक्रिया समोर आली आहे. लोकांच्या पैशांचा दुरुपयोग होत आहे, असं म्हणत काँग्रेसने टीका केली. या प्रकरणाची संयुक्त संसदीय समिती (जेसीपी) आणि सार्वजनिक लेखा समिती (पीएसी) कडून या चौकशीची मागणी काँग्रेसने केली आहे.

या आरोपानंतर एलआयसीने एका निवेदन जाहीर करत 'वॉशिंग्टन पोस्ट'मधील आरोप निराधार आणि खोटे असल्याचं म्हटलं. कंपनीने पुढे स्पष्ट केलं आहे की, 'कंपनीच्या निर्णयावर बाह्य घटकांचा कोणताही प्रभाव पडत नाही. यात इतर कोणाची भूमिका नाही'. कंपनीने मागील काही वर्षात तपास करून विविध कंपन्यांमध्ये गुंतवणूक केली आहे. भारतातील ५०० प्रमुख कंपन्यामधील २०१४ सालापासूनची गुंतवणूक १० टक्क्यांनी वाढली आहे. एकंदरित १.५६ लाख कोटींची गुंतवणूक आता १५.६ लाख कोटी रुपये इतकी झाली आहे. दुसरीकडे अदानी समूहाने या प्रकारच्या गुंतवणुकीचा कोणत्याही सरकारी योजनेशी संबंध नसल्याचे म्हटलं आहे.

'वॉशिंग्टन पोस्ट'चं म्हणणं आहे की, या वृत्तावर आतापर्यंत नीती आयोगाकडून कोणतीही प्रतिक्रिया समोर आलेली नाही'. अदानी समूहाच्या कंपनीचे मालक गौतम अदानी हे जगातील सर्वात श्रीमंत व्यक्ती राहिलेले आहेत. त्यावेळी त्यांची संपत्ती जवळपास ९० अब्ज डॉलर इतकी होती.