Lebanon Pagers Blast: लेबनॉनमध्ये सिरियल ब्लास्ट, इराणच्या राजदूतासह 1000 हून अधिक जण जखमी; खिशात पेजर्समध्ये ठेवले होती स्फोटकं

लेबनॉनमध्ये सिरियल ब्लास्ट झाल्याची घटना घडलीय. येथील पेजर स्फोटात 1000 हून अधिक लोक जखमी झालेत. या जखमींमध्ये हिजबुल्लाचे सैनिक आणि आरोग्य कर्मचाऱ्यांचाही समावेश आहे. या भयाण घटनेत इराणचे राजदूत मोजितबा अमानी हे देखील जखमी झालेत. इराणच्या मेहर न्यूज एजन्सीने याबाबत माहिती दिली आहे.

आज दुपारी शेकडो हिजबुल्लाहाचे बंडखोर गंभीर जखमी झाल्याची माहिती लेबनॉनने दिलीय. मात्र या स्फोटात कोणाचा मृत्यू झाला याबाबत सध्या कोणतीही माहिती मिळालेली नाहीये. हिजबुल्लाहाचे सदस्य एकमेकांशी संवाद साधण्यासाठी पेजर वापरत होते आणि त्याच पेजरमधून स्फोट घडवून आणल्याचे सांगण्यात येत आहे.

हा सीरियल ब्लास्ट दक्षिण लेबनॉन आणि राजधानी बेरूतसह अनेक ठिकाणी झाला. ही घटनेकडे हिजबुल्लाहच्या इतिहासातील सर्वात मोठी गुप्तचर त्रुटी म्हणून पाहिले जातंय. स्थानिक वेळेनुसार दुपारी ३.४५ वाजता हा स्फोट झाल्याचे सांगण्यात येत आहे. एकापाठोपाठ एक अनेक स्फोट झालेत. स्फोट झाल्यानंतर तासभर परिसरात गोंधळाचे वातावरण निर्माण झाल्याचे बोलले जात आहे.

तर या हल्ल्यामागे इस्रायलचा हात असल्याचा संशय हिजबुल्लाह यांनी वर्तवलाय. सिरियल ब्लास्ट झाल्यानंतर लेबनान सरकारने सर्व लोकांकडे असलेले पेजर्स फेकण्यास सांगितलंय. पेजर्ससह रेडिओ आणि ट्रान्समीटरमध्येही स्फोट होऊ शकतो, असा संशय व्यक्त केला जात आहे.

दरम्यान लेबनानसह सीरियामध्येही पेजर ब्लास्ट झाल्याच्या घटना घडल्याचं सांगितलं जात आहे. यात हिजबुल्लाहचे अनेक बंडखोर यात जखमी झालेत. जखमींना सीरियाची राजधानी दश्मिक येथील रुग्णालयात आणि त्याच्या जवळील इतर रुग्णालयात दाखल करण्यात आले आहे. ज्याप्रकारे हा हल्ला झाला ते पाहता असा हल्ला इतिहासात कधी झाला नव्हता असं हिजबुल्लाहकडून सांगण्यात आलाय.