Chhatrapati Shivaji Maharaj : 'छत्रपती शिवाजी महाराज नसते, तर माझं नाव...', भाजपच्या बड्या नेत्याचं विधान चर्चेत

Chhatrapati Shivaji Maharaj News : मध्यप्रदेशचे कॅबिनेट मंत्री आणि भारतीय जनता पक्षातील दिग्गज नेते कैलाश विजयवर्गीय यांच्या एका विधानाची सोशल मीडियावर चर्चा होत आहे. छत्रपती शिवाजी महाराज यांच्याविषयी त्यांनी वक्तव्य केले होते. 'शिवराय नसते, तर माझं नाव कैलाश नसतं' असे ते म्हणाले. मध्यप्रदेशच्या राजकारणात कैलाश विजयवर्गीय यांचे मोठे नाव आहे. ते भाजपचे माजी राष्ट्रीय महासचिव आहेत.

महाराष्ट्राप्रमाणे देशभरात काल शिवजयंती साजरी करण्यात आली. मध्यप्रदेशच्या इंदूरमध्येही शिवजयंतीच्या निमित्ताने मोठ्या कार्यक्रमाचे आयोजन करण्यात आले होते. या कार्यक्रमामध्ये कैलाश विजयवर्गीय यांनी 'जर छत्रपती शिवाजी महाराज नसते तर माझं नाव कैलाश नसून कलीमुद्दीन असतं' असे विधान केले.

मंत्री कैलाश विजयवर्गीय म्हणाले, 'आज जर हिंदू धर्म जीवंत तो फक्त छत्रपती शिवाजी महाराज यांच्यामुळेच.. त्यांनी माळवा, छत्तीसगडपर्यंत मुघलांना घुसूच दिले नाही. ते जर नसते तर आज माझं नाव कलीमुद्दीन असतं. छत्रपती शिवाजी महाराज यांनी हिंदू धर्माच्या रक्षणासाठी मोठी फौज उभी केली होती. त्यांनी मावळ्यांसोबत मुघलांच्या लाखोंच्या सेनेचा पराभव केला.'

'छत्रपती शिवाजी महाराज यांनी सनातन धर्माचे रक्षण केले. त्यांच्यामुळे दक्षिणेकडच्या भागांमध्ये मुघल घुसू शकले नाही. शिवाजी महाराज यांच्यानंतर ब्रिटीश भारतात शिरले. महाराज जर असते, तर ब्रिटीश आपल्या देशात घुसू शकले नसते', असे विधान कैलाश विजयवर्गीय यांनी शिवजयंतीच्या एका कार्यक्रमामध्ये केले.