२ नातवंडांच्या आजीला म्हातारचळ; बॉयफ्रेंडच्या प्रेमात सैराट, सुनांचे दागिने घेऊन फरार

उत्तर प्रदेशातील झांसी जिल्ह्यातून धक्कादायक बातमी समोर येत आहे. एका ४० वर्षीय महिला अचानक तिच्या प्रियकरासोबत पळून गेली आहे. ही महिला दोन मुलांची आई आणि दोन लहान नातवंडांची आजी आहे. कुटुंबातील सदस्यांचा आरोप आहे की, ती जाताना तिच्या सुनांचे दागिने आणि रोख रक्कमही सोबत घेऊन गेली. या घटनेनंतर संपूर्ण कुटुंबाला धक्का बसला आहे.

महिलेचा पती कामता प्रसाद हा सायवारी गावातील रहिवासी आहे. कामता म्हणाले की, सुमारे अडीच वर्षांपूर्वी पती आपल्या पत्नीला वीटभट्टीवर काम करायला घेऊन गेले होते. तिथे त्यांच्या पत्नीची ओळख बिहुनी गावातील रहिवासी अमर सिंह प्रजापतीशी झाली. सुरूवातीला त्यांची भेट अनौपचारिक झाली. नंतर दोघांमध्ये मैत्री झाली.

हळूहळू दोघांमध्ये जवळीक वाढली. कुटुंबाला त्यांच्या वागण्यावर संशय येऊ लागला. दोघेही कायम फोनवर बोलत असत. पतीनं महिलेला अनेकवेळा समजावून सांगण्याचा प्रयत्न केला. परंतु दोघांची कायम भेट व्हायची. काही दिवसांपू्र्वी कामता मुलाच्या उपचारासाठी झाशी गेले होते.

त्याच्या पत्नीनं संधी साधली. घरातून सुमारे ४० हजार रोख, सुनांचे दागिने चोरून प्रियकरासोबत पळ काढला. यामुळे संपूर्ण कुटुंबाला धक्का बसला. महिलेनं कुटुंबाला आर्थिक आणि भावनिकदृष्ट्या उद्ध्वस्त केलं. यानंतर कुटुंबाने पोलीस ठाण्यात धाव घेतली. तसेच तक्रार दाखल करून दोघांना लवकर शोधून काढण्याची मागणी केली. पोलिसांनी तातडीने गुन्हा दाखल करून तपासाला सुरूवात केली.