सर्वात भयंकर अपघात! CRPF जवानांची बस २०० फूट खोल दरीत कोसळली, ३ जणांचा मृत्यू, १५ गंभीर

Crpf Bus Accident in Udhampur : जम्मू काश्मीरच्या उधमपूरमध्ये एक दुर्दैवी अपघात झाला आहे. सीआरपीएफ जवानांना घेऊन जाणारी बस २०० फूट दरीत कोसळली. या दुर्दैवी घटनेत तीन जवानांचा मृत्यू झाला तर १५ जण जखमी आहेत. यामधील अनेकांची प्रकृती गंभीर असल्याचे सांगण्यात येत आहे. जखमी जवानांना उपचारासाठी रूग्णालयात दाखल करण्यात आले आहे. घटानस्थळावर अद्याप बचावकार्य सुरू आहे.

मिळालेल्या माहितीनुसार, सीआरपीएफच्या १८७ वी तुकडीची बस उधमपूरमधील कदवा या ठिकाणाहून वसंत गड या ठिकाणी निघाली होती. त्यामध्ये अनेक जवान होते. त्यावेळी अचानक मोठी दुर्घटना घडली अन् बस २०० फूट खोल दरीत कोसळली. या दुर्घटनेत तीन जवानांचा मृत्यू झाला तर १५ पेक्षा जास्त जण जखमी आहेत. जखमींवर जवळच्या रूग्णालयात उपचार सुरू आहेत.

सीआरपीएफच्या अपघातग्रस्त बसमध्ये १८ जवान होते. आज सकाळी साडेदहा वाजता हा अपघात झाला. अपघातामध्ये जखमी जवानांना उपचारासाठी विमानाने उधमपूर येथील लष्कराच्या रूग्णालयात दाखल करण्यात आले आहे. त्यांच्यावर उपचार सुरू आहेत. या अपघाताचे कारण अद्याप समोर आलेले नाही. घटनास्थळी बचावकार्य सुरू आहे.

उधमपूरमधील कंदवा-बसंतगढ परिसरात सीआरपीएफचे एक वाहनाचा अपघात झाला आहे. या दुर्घटनेत काही जवानांच्या बलिदानाची बातमी ऐकून दुख: झाले. वाहनात सीआरपीएफचे अनेक शूर जवान होते. मी नुकतीच डीसी सलोनी राय यांच्याशी बोललो. त्या स्वत: परिस्थितीवर लक्ष ठेवून मला माहिती देत आहेत. बचाव कार्य तात्काळ सुरू करण्यात आले आहे. स्थानिक लोक स्वत:हून मदतीसाठी पुढे आले आहेत. सर्वतोपरी मदत सुनिश्चित केली जात आहे, असे ट्वीट केंद्रीय मंत्री डॉ. जितेंद्र सिंह यांनी ट्वीट केले आहे.