Indonesia Oil Depot Fire: मोठी दुर्घटना! इंधन डेपोला भीषण आग; आगीत होरपळून १७ जणांचा मृत्यू

Indonesia Fire: इंडोनेशिया येथे एक मोठी दुर्घटना घडली आहे. भंजराण इंधन डेपोला काल शुक्रवारी भीषण आग लागली. यामध्ये १७ व्यक्तींचा मृत्यू झाल्याचं समजलं आहे. तसेच अनेक व्यक्तींना या दुर्घटनेत गंभीर दुखापत झाली आहे. आग इतकी भीषण होती की, आसपासच्या परिसरात देखील ती पसरण्याची शक्यता होती. त्यामुळे तेथील नागरिकांना तात्काळ अन्य ठिकाणी हालवण्यात आले. (Latest Fire News)

स्थानिक माध्यमांनी दिलेल्या माहितीनुसार, इंडोनेशियातील भंजराण डेपोला भीषण आग लागली होती. यात सरकारी इंधन डेपो आणि गॅस कंपनी असलेल्या पर्टामिनाजवळ दाड लोकवस्ती आहे. त्यामुळे येथील नागरिकांना लगेच सुरक्षित ठिकाणी हलवण्यात आलं. उत्तर जकार्ताजवळील तनाह मेराह परिसरात ही घटना घडली आहे. इंडोनेशियातील हा सर्वात मोठा इंधन डेपो होता. येथून जवळपास २५ टक्के इंधन पुरवले जात होते.

इंधनाचे टँक असल्याने आग लागताच मोठा स्फोट झाला आणि एका क्षणात आगीने रौद्र रुप धारण केलं. घटनेची माहिती मिळताच अग्निशमन दलाची वाहने घटनास्थळी दाखल झाली. तब्बल १८० अग्निशमन बंब घटनास्थळी दाखल झाले होते. तसेच ३७ फायर इंजिन्स देखील आग अटोक्यात आणण्याचा प्रयत्न करत होते.