Earthquake News : इंडोनेशिया हादरलं! ७.७ तीव्रतेचे भूकंपाचे धक्के; २० जणांचा मृत्यू

इंडोनेशियातून मोठी बातमी समोर आली आहे. इंडोनेशियातील फ्लोरेस बेट भूकंपाने हादरले. आज सकाळच्या सुमारास हे धक्के जाणवले असून या भूकंपाची तीव्रता ७.७ इतकी आहे. भूकंपामुळे अनेक भागांत भीतीचे वातावरण निर्माण झाले असून, आतापर्यंत २० जणांचा मृत्यू झाला आहे. तसेच अनेक नागरिक जखमी झाल्याचेही समोर आले आहे. जीवितहानीसोबतच वित्तहानी झाल्याचीही माहिती आहे.

अमेरिकन जिओलॉजिकल सर्व्हे (USGS) नुसार, स्थानिक वेळेनुसार सकाळी सुमारे ६ वाजता हा भूकंप झाला. भूकंपाचा केंद्रबिंदू एंडे शहरापासून सुमारे ६८ किलोमीटर अंतरावर समुद्राखाली होता. एका मोठ्या धक्क्यानंतर ५.९,५.६ आणि ६.१ तीव्रतेचे सौम्य धक्के नोंदवण्यात आले. भूकंपानंतर काही किनारी भागांमध्ये समुद्र खवळल्याचे दिसून आले. नागेकेओ परिसरातील नागरिकांनी हे दृश्य पाहिल्यानंतर त्सुनामीची भीती निर्माण झाली आणि अनेकांनी सुरक्षिततेसाठी किनारी भागातून पळ काढला. सुरुवातीला काही किनारी भागांसाठी त्सुनामीचा इशारा जारी करण्यात आला होता. मात्र, काही तासांनंतर हा इशारा मागे घेण्यात आला.

दरम्यान, सोशल मीडियावर भूकंपामुळे इमारतींचे नुकसान झाल्याचे आणि काही इमारती कोसळल्याचे व्हिडिओ समोर आले आहेत. सिक्का येथील सेंट पीटर मेजर सेमिनरीमध्ये सकाळची प्रार्थना सुरू असताना सभागृहाच्या छताचा काही भाग कोसळला. घाबरलेले विद्यार्थी बाहेर धावले. जीव वाचवण्यासाठी एकाने दुसऱ्या मजल्यावरून उडी मारल्याने त्यांच्या पायाला फ्रॅक्चर झाल्याची माहिती मिळाली.

भूकंपानंतर खबरदारीचा उपाय म्हणून अनेक रुग्णालयांमधील रुग्णांना बाहेर काढण्यात आले. रुग्णालयांच्या बाहेर स्ट्रेचर, ऑक्सिजन सिलिंडर आणि आयव्ही स्टँडची व्यवस्था करून काही ठिकाणी मोकळ्या जागेत उपचार सुरू करण्यात आले. अधिकाऱ्यांनी नागरिकांना नुकसान झालेल्या इमारतींपासून दूर राहण्याचे आवाहन केले आहे. दरम्यान भूकंपाचे सौम्य धक्के पुन्हा बसू शकतात असा अंदाज वर्तवण्यात आला आहे.