हंटा नंतर इबोलाचा कहर! आता पर्यंत 80 हून अधिक मृत्यू, जगभरात भीतीचं सावट

कोरोनाच्या भयंकर अनुभवानंतर आता जगावर आणखी एका जीवघेण्या व्हायरसचे संकट घोंगावतंय. 'इबोला' या प्राणघातक विषाणूचा जगभरात उद्रेक झालाय. परिस्थिती इतकी हाताबाहेर गेली आहे की, जागतिक आरोग्य संघटनेला आंतरराष्ट्रीय आरोग्य आणीबाणी घोषित करावी लागलीय...या व्हायरसमुळे आतापर्यंत 80 पेक्षा जास्त रुग्णांचा मृत्यू झालाय...आफ्रिकेतील काँगो आणि शेजारील युगांडामध्ये इबोला विषाणूने थैमान घातलयं... हा व्हायरस नेमका कसा पसरतो आणि त्याचे काय परिणाम होतात? पाहुयात...

काय आहे इबोला व्हायरस?

- इबोला जगातील घातक विषाणू, मृत्यूचं प्रमाण 50 ते 90%

- बाधित व्यक्तीच्या रक्त, घाम किंवा लाळेच्या संपर्कात आल्यानं विषाणूचा प्रसार

- अचानक तीव्र ताप येणं, स्नायू दुखणं, थकवा आणि घसा खवखवणं

- आजार बळावल्यास उलट्या, जुलाब आणि किडनीसह यकृत निकामी होऊन अंतर्गत रक्तस्त्राव

आतापर्यंत इबोलाचा 'झायर' स्ट्रेन हा सर्वाधिक भयानक विषाणू मानला जायचा...मात्र त्या व्हायरसवर लस उपलब्ध आहे. मात्र यावेळचा उद्रेक इबोलाच्या 'बुंदिबुग्यो' या अत्यंत दुर्मिळ आणि धोकादायक स्ट्रेनमुळे झालाय... सर्वात चिंतेची बाब म्हणजे, या नव्या स्ट्रेनवर अद्याप कोणतीही अधिकृत मान्यताप्राप्त लस किंवा निश्चित औषध उपलब्ध नाही. यामुळेच आरोग्य यंत्रणांसमोर मोठे आव्हान उभे ठाकले आहे.

सध्या काँगोच्या पूर्व भागात असलेल्या 'इटुरी' प्रांतात या जीवघेण्या आजाराने सर्वाधिक थैमान घातलयं...बुनिया, र्‍वामपारा आणि मोंगब्वालू या तीन आरोग्य क्षेत्रांमध्ये 246 संशयित रुग्ण आढळलेत. युगांडात ही इबोलाचे रुग्ण आढळलेत...त्यामुळे एकीकडे कोरोनाच्या संकटातून जग कुठे सावरत नाही, तोच इबोलाच्या या नव्या स्ट्रेनने जागतिक आरोग्य यंत्रणांची परीक्षा घ्यायला सुरुवात केलीय. जरी हा उद्रेक सध्या आफ्रिकेपूरता मर्यादित असला, तरी हा संसर्गजन्य व्हायरस असल्यानं विमान प्रवासामुळे इतर देशांमध्येही व्हायरस पसरु शकतो. यासाठी आरोग्य विभागांनी अधिक सतर्क राहण्याची गरज निर्माण झाली आहे. आधीच आखाती युद्धामुळे इंधन कोंडी होऊन जगावर आर्थिक संकट ओढावलं आहे. अशातच 'इबोला' व्हायरसमुळे आरोग्य यंत्रणा सक्षम ठेवण्याचं आव्हान सर्वच देशांसमोर आहे.