Firing: हॉटेलमध्ये अंदाधुंद गोळीबार, ५ जणांचा जागीच मृत्यू

• गुवाहाटीच्या हॉटेलमध्ये गोळीबाराची घटना

• गुवाहाटी गोळीबारात पाच जणांचा मृत्यू आणि अनेक जखमी

• परवानाधारक पिस्तुलातून गोळीबार झाल्याची पोलिसांची माहिती

आसाममध्ये गोळीबाराची भयंकर घटना घडली. गुवाहाटीच्या हॉटेलमध्ये रात्री अंदाधुंद गोळीबार करण्यात आला. या गोळीबारामध्ये ५ जणांचा मृत्यू झाला तर अनेक जण जखमी झाले. ही घटना गुवाहाटीच्या बोरा सर्विस भागातील हॉटेल विलासमध्ये घडली. या घटनेमुळे परिसरात गोंधळाचे आणि भीतीचे वातावरण होते. घटनेची माहिती मिळताच पोलिसांनी घटनास्थळी धाव घेतली. या गोळीबाराचे कारण आणि हेतू अद्याप समजलेला नाही.

पोलिसांनी दिलेल्या माहितीनुसार, ही घटना उलुबारी परिसरात घडली. गोळीबार करणाऱ्या आरोपींना पकडण्यासाठी पोलिसांची पथके रवाना करण्यात आली आहेत. जखमींमध्ये हॉटेलमधील काही कर्मचाऱ्यांचा समावेश आहे. गुवाहाटीचे पोलिस आयुक्त पार्थ सारथी महंत यांनी गोळीबारात पाच जणांच्या मृत्यूची माहिती दिली. त्यांनी सांगितले की, 'आज गुवाहाटीच्या मध्यभागी एक दुर्दैवी घटना घडली. आम्हाला पाच मृतदेह सापडले असून ते शवविच्छेदनासाठी गुवाहाटी मेडिकल कॉलेज आणि हॉस्पिटल येथे पाठवण्यात आले आहेत. आम्ही लवकरच गुन्हेगारांना पकडू.'

हल्लेखोराने हॉटेलमध्ये अंदाधुंद गोळीबार केला. त्याला रोखण्यासाठी इतर जण गेले असता त्याने त्यांनाही सोडले नाही. या हॉटेलचे मूळ मालक हेलेना भराली आहेत ज्यांनी ही मालमत्ता विविध व्यक्तींना भाड्याने दिली आहे. गुवाहाटी पोलिस आयुक्तांच्या म्हणण्यानुसार, या घटनेत परवानाधारक ३२-बोर पिस्तुलाचा वापर करण्यात आला. पोलिसांनी गोळीबारासाठी वापरण्यात आलेले शस्त्र जप्त केले असून पुढील तपास सुरू आहे. या घटनेनंतर नागरिकांमध्ये भीतीचे वातावरण आहे. आसाम काँग्रेसने राज्यातील सार्वजनिक सुरक्षा आणि कायदा व सुव्यवस्थेबद्दल प्रश्न उपस्थित केले आहेत.