Accident : भीषण अपघात! कार-एसयूव्हीच्या धडकेत लागलेल्या आगीत ७ जण जिवंत जळाले

Accident News : गुजरातमधून एक धक्कादायक बातमी समोर आली आहे. गुजरातमधील सुरेंद्रनगर जिल्ह्यात महामार्गावर भीषण अपघात झाला. कार आणि एसयूव्हीमध्ये जोरदार टक्कर झाला. या धडकेमुळे लागलेल्या आगीत कारमधील सात जण जिवंत जळाल्याचे म्हटले जात आहे. पोलीस, अग्निशमन दल घटनास्थळी दाखल झाले आहेत. बचावकार्य सुरु आहे.

मिळालेल्या माहितीनुसार, गुजरातमधील सुरेंद्रनगर जिल्ह्यात महामार्गावर दुर्घटना घडली. कार आणि एसयूव्ही यांची धडक झाली. हा अपघात इतका भयावह होता की, धडकेनंतर लागलेल्या आगीमध्ये कारमध्ये बसलेल्या सात जणांचा जिवंतपणी जळून अंत झाला. ही घटना देदादरा गावाजवळ घडल्याचे म्हटले जात आहे.

वाधवान पोलीस ठाण्याचे निरीक्षक पीबी जडेजा यांनी दिलेल्या माहितीनुसार, या अपघातात कारमधील ७ जण जिवंत जळाले. त्याच वेळी एसयूव्हीमधील तिघेजण गंभीररित्या जखमी झाले आहेत. या अपघातामुळे महामार्गावर मोठी वाहतूक कोंडी झाली होती. अग्निशमन दलाच्या पथकाने मदत आणि बचाव कार्य सुरु केले. पण आगीत अडकलेल्या लोकांना वाचवणे शक्य झाले नाही.

दहीहंडीच्या कार्यक्रमादरम्यान अपघात

गुजरातमध्ये जन्माष्टमीनिमित्त दहीहंडी कार्यक्रमादरम्यान काहीजणांवर विजेचा खांब पडला. या अपघातामध्ये १५ वर्षीय मुलाचा मृत्यू झाला आणि दोन ते तीन जण जखमी झाले. या घटनेचा व्हिडीओ सोशल मीडियावर व्हायरल होत आहे. जखमींना उपचारासाठी जवळच्या रुग्णालयात दाखल करण्यात आल्याचे म्हटले जात आहे.