Mumbai : सतत डोअरबेल वाजवल्याने सटकली, तरुणाने डिलिव्हरी बॉयवर केला गोळीबार; मुंबईत थरार

Mumbai Crime News : मुंबईमधून एक धक्कादायक प्रकार समोर आला आहे. मुंबईच्या लोअर परेल परिसरात एकाने ऑर्डर करण्याबाबत झालेल्या मतभेदावरून डिलिव्हरी बॉयवर गोळीबार केला. डिलिव्हरी बॉयने दाराची बेल अनेकदा वाजवली, यामुळे ऑर्डर करणारी व्यक्ती चिडली आणि रागाच्या भरात त्याने गोळीबार केला, असे म्हटले जात आहे.

मिळालेल्या माहितीनुसार, लोअर परेल परिसरात राहणाऱ्या सौरभकुमार अविनाशकुमार सिंग या व्यक्तीने डिलिव्हरी साईटवर औषधे ऑर्डर केली. त्याची ऑर्डर घेऊन डिलिव्हरी बॉय घराबाहेर उभा राहिला. अनेकदा दाराची बेल वाजवल्याने सौरभकुमार संतापला. त्याने रागाच्या भरात एअरगनने गोळीबार केला. या प्रकारामुळे परिसरात खळबळ उडाली.

डिलिव्हरी बॉयने पोलिसांना या घटनेची माहिती दिली. सौरभकुमारने फोनवरुन औषधे मागवली होती. पण पॅकेज स्वीकारण्यास नकार दिला. चुकीचे पॅकेज असल्याचे सांगितले. वादानंतर त्याने एअरगनने गोळीबार केला, असे डिलिव्हरी बॉयने म्हटले आहे. या गोळीबारात सुदैवाने कोणालाही दुखापत झाली नसल्याचे पोलिसांनी सांगितले आहे.

३५ वर्षीय आरोपी आणि डिलिव्हरी बॉय या दोघांनाही अधिक चौकशीसाठी पोलीस ठाण्यात नेण्यात आले आहे. चौकशीदरम्यान, गोळीबार करणाऱ्या सौरभकुमारने औषध मागवल्याचे कबूल केले. पण डिलिव्हरी बॉय सतत बेल वाजवत असल्याने रागात पॅकेज घेण्यास नकार दिला आणि एअरगनमधून गोळीबार केला. या प्रकरणी पोलिसांनी गुन्हा दाखल केला आहे.