Shocking : जनगणनेसाठी निघालेल्या शिक्षिकेसोबत भयंकर घडलं! मुख्याध्यापकाने केली हत्या; नंतर मृतदेह जाळला

गुजरातमधील अहमदाबाद जिल्ह्यात एक धक्कादायक घटना उघडकीस आली आहे. जनगणना कामासाठी घराबाहेर पडलेल्या शिक्षिकेची तिच्याच पतीने हत्या करून पुरावे नष्ट करण्यासाठी मृतदेह जाळला. या प्रकरणात पोलिसांनी आरोपी पतीला अटक केली असून त्याने चौकशीदरम्यान गुन्ह्याची कबुली दिली आहे. कौटुंबिक वादातून ही हत्या केल्याचे त्याने सांगितले असल्याची माहिती पोलिसांनी दिली. याप्रकरणात पोलीस पुढील तपास करत आहेत.

मिळालेल्या माहितीनुसार, मृत शिक्षिकेचे नाव रीना जाला (वय ४५) असे असून त्या चालोडा प्राथमिक शाळेत कार्यरत होत्या. त्यांचे पती बलदेव हे खत्रीपुर गावातील सरकारी शाळेचे मुख्याध्यापक आहेत. बुधवारी सकाळी दोघेही जनगणना ड्युटीसाठी एकाच स्कूटरवरून घराबाहेर पडले होते. मात्र काही वेळानंतर रीना अचानक बेपत्ता झाल्याचे सांगत बलदेवने पोलिसांत तक्रार दाखल केली. दरम्यान, त्याच दिवशी ढोलका परिसरातील नर्मदा कालव्याजवळ एका महिलेचा अर्धवट जळालेला मृतदेह आढळून आला.

हा मृतदेह गावातील एका शेतकऱ्याने पाहिला आणि त्याने याबाबत पोलिसांना माहिती दिल्यानंतर ढोलका ग्रामीण पोलीस, सर्व्हिलन्स पथक आणि अहमदाबाद ग्रामीण स्थानिक गुन्हे शाखेने घटनास्थळी धाव घेत तपास सुरू केला. मृतदेहाची ओळख पटवण्याचे प्रयत्न सुरू असताना तो रीना जाला यांचाच असल्याचे उघडकीस आले. तपासादरम्यान पोलिसांना बलदेवच्या जबाबात वेगळेपणा आढळून आला. त्यामुळे तांत्रिक पुरावे, मोबाईल लोकेशन आणि इतर माहितीच्या आधारे पोलिसांनी त्याची सखोल चौकशी केली. चौकशीदरम्यान बलदेवने पत्नीची हत्या केल्याची कबुली दिली.

पोलिसांच्या माहितीनुसार, जनगणना कामासाठी जात असताना पती-पत्नीमध्ये वाद झाला. त्यानंतर बलदेवने स्कूटर कालव्याजवळील निर्जन ठिकाणी नेली आणि संतापाच्या भरात दगडाने रीना यांच्या डोक्यावर वार करून त्यांची हत्या केली. त्यानंतर ओळख लपवण्यासाठी स्कूटरमधील पेट्रोल काढून मृतदेहावर शिंपडले आणि तो जाळण्याचा प्रयत्न केला. यानंतर त्याने पत्नी हरवल्याची खोटी तक्रार दाखल करून पोलिसांची दिशाभूल करण्याचा प्रयत्न केला. मात्र पोलिसांच्या तातडीच्या कारवाईने आरोपीचा ढोंगी कारभार समोर आला.