Shocking : नूडल्स खाऊन झोपले, सकाळी उठलेच नाहीत, एकाच कुटुंबातील ५ जणांचा मृत्यू; नेमकं काय घडलं ?

उत्तर प्रदेशातील ग्रेटर नोएडा येथे एकाच कुटुंबातील पाच जणांचा मृत्यू झाल्याची धक्कादायक घटना समोर आली आहे. मृतांमध्ये पती-पत्नी आणि त्यांच्या तीन लहान मुलांचा समावेश आहे. या घटनेमुळे परिसरात खळबळ उडाली असून, कुटुंबाच्या मृत्यूमागील नेमके कारण शोधण्यासाठी पोलिसांनी तपास सुरू केला आहे. रात्रीच्या जेवणात नूडल्स खाल्ल्यानंतर ही घटना घडल्याची माहिती शेजाऱ्यांनी दिली आहे. मात्र, मृत्यूचे कारण अद्याप अधिकृतरीत्या स्पष्ट झालेले नाही.

मिळालेल्या माहितीनुसार, ही घटना रबूपुरा पोलीस ठाण्याच्या हद्दीतील नगला श्री पदम गावात घडली. शनिवारी सकाळी बराच वेळ होऊनही घरातील कोणीही बाहेर आले नाही. म्हणून शेजाऱ्यांना संशय आला. त्यांनी घराचा दरवाजा ठोठावला आणि आवाज दिला; मात्र आतून कोणताही आवाज आला नाही. त्यानंतर खिडकीतून डोकावून पाहिले असता घरातील पाचही जण बिछान्यावर पडल्याचे दिसून आले.

याची माहिती तातडीने पोलिसांना देण्यात आली. घटनास्थळी पोहोचलेल्या पोलिसांनी दरवाजा तोडून घरात एन्ट्री केली. त्यावेळी कुटुंबातील सर्वजण बेशुद्ध अवस्थेत आढळले. त्यांच्या तोंडातून फेस येत असल्याचेही निदर्शनास आले. पोलिसांनी सर्वांना तातडीने रुग्णालयात दाखल केले. मात्र, डॉक्टरांनी तपासणीनंतर पाचही जणांना मृत घोषित केले. मृतांची नावे महेश (वय ३७), त्यांची पत्नी ललिता (वय ३५), तसेच त्यांची मुले लड्डू (वय ११), मिष्टी (वय ७) आणि साक्षात (वय ३) अशी आहेत. एकाच वेळी संपूर्ण कुटुंबाचा मृत्यू झाल्याने गावात शोककळा पसरली आहे.

घटनेची माहिती मिळताच वरिष्ठ पोलीस अधिकारी, स्थानिक पोलीस पथक, वैद्यकीय कर्मचारी आणि अन्न सुरक्षा विभागाचे अधिकारी घटनास्थळी दाखल झाले. प्राथमिक तपासात अन्नातून विषबाधा झाल्याची शक्यता व्यक्त करण्यात येत आहे. महेश यांच्या आईसह शेजाऱ्यांनी कुटुंबाने रात्री नूडल्स खाल्ल्याचे सांगितले आहे. अन्नाचे नमुने, वैद्यकीय तपासणी आणि इतर पुराव्यांच्या आधारे मृत्यूचे नेमके कारण स्पष्ट होण्याची अपेक्षा आहे. पोलिसांकडून सर्व शक्यता तपासल्या जात असून, या घटनेचे गूढ उकलण्यासाठी पुढील तपास सुरू आहे.