Crime: नोकरीचे आश्वासन देऊन घात केला; धावत्या कारमध्ये तरुणीवर सामूहिक अत्याचार, शहर हादरलं

उत्तरप्रदेशातून एक धक्कादायक घटना समोर आली आहे. एका अल्पवयीन मुलीला नौकरीची भूलथाप देत तिच्यावर सामूहिक बलात्कार करण्यात आला आहे. या प्रकरणाची माहिती पोलिसांना मिळाल्यानंतर त्यांनी आरोपींना अटक केली असून, पळ काढणाऱ्या आरोपीला पकडताना पोलिसांनी गोळीबार केला. यात आरोपींच्या पायाला जखम झाल्याची माहिती समोर आली आहे. या घटनेनंतर परिसरात खळबळ उडाली असून, नराधमांची कसून चौकशी सुरू आहे.

पोलीस ठाण्यात दाखल झालेल्या तक्रारीनुसार, पीडित महिला मूळची प्रतापडची रहिवासी आहे. ती नोएडातील जलेबी चौक परिसरात आपल्या मामासोबत भाड्याच्या घरात राहत होती. तसेच त्याच परिसरात ती खासगी कंपनीत कामाला होती. काही तरूणांनी पीडित मुलीला चांगल्या ठिकाणी नोकरी लावून देण्याची भूलथाप दिली. ६ मे रोजी पीडित मुलगी आपल्या मैत्रिणीसोबत सूरजपुर कोर्ट परिसरात गेली होती. तिला तरूणांनी फार्महाऊसमध्ये नेलं तसेच तिला दारू पाजली.

तसेच तिला एका वाहनात बसवून परिसरात फिरवलं. तिच्यासोबत तिची मैत्रीण देखील उपस्थित होती. कारमधील तरूणांनी पीडित मुलीच्या मैत्रिणीला देखील दारू पाजली. तसेच तिला रस्त्याच्या कडेला धक्का मारून उतरवले आणि आरोपींनी पीडित मुलीसोबत चालत्या कारमध्येच लैंगिक अत्याचार केला.

यानंतर पीडित मुलीने तातडीने पोलीस ठाणे गाठत पोलिसांना आपबिती सांगितली. या प्रकरणानंतर पोलिसांनी तातडीने घटनास्थळी धाव घेत आरोपींना ताब्यात घेतलं. त्यातील २ आरोपी हे पळ काढत होते. मात्र, पोलिसांनी त्यांच्या पायाला गोळी मारली आणि त्यांना पकडले. या प्रकरणाची पोलीस अधिक चौकशी करत असून, पुढील तपास सुरू आहे.