बड्या महिला अधिकाऱ्याला लाच घेताना रंगेहाथ पकडले; लोकायुक्ताची मोठी कारवाई

देशात लाचखोर आधिकारी आणि कर्मचाऱ्यांविरुद्ध लोकायुक्तची कारवाई सातत्याने सुरू आहे. जवळपास दर दुसऱ्या दिवशी देशात कुठे ना कुठे भ्रष्ट अधिकाऱ्यांना रंगेहाथ पकडले जात आहे. तरी देखील लाचखोरीचे प्रमाण कमी होताना दिसत नाही. अशातच आज मध्यप्रदेशमधील इंदूर जिल्ह्यातील महू येथे एका महिला उपअभियांताला लाच घेताना लोकायुक्तांनी सापळा रचत अटक केली आहे.

लोकायुक्तांनी दिलेल्या माहितीनुसार, हे प्रकरण ग्रामपंचायत यशवंत नगरचे आहे. याठिकाणी 4 लाख रुपये खर्च करून रस्ता बांधण्यात आला होता. रस्ते बांधकाम पूर्ण झाल्यानंतर उपअभियंता सावित्री मुवेल यांनी या प्रक्रियेत अडथळा निर्माण करून पंचायत सचिव रमेशचंद्र चव्हाण यांच्याकडे 15 रुपयांची लाच मागितली. जो पर्यंत पैसे देणार नाही तो पर्यंत बिल आणि पेमेंट मिळणार नाही असे तिने सांगितले.

पंचायत सचिव रमेशचंद्र चौहान यांनी यासंदर्भात इंदूर लोकायुक्त कार्यालयात तक्रार दिली. लोकायुक्तने तक्रारीची शहानिशा केली आणि ती खरी असल्याचे आढळल्यानंतर शुक्रवारी सापळा रचला. ठरल्याप्रमाणे तक्रारदाराला १५ हजार रुपये घेऊन सावित्री मुवेल यांच्याकडे पाठवण्यात आले. जशी आरोपी उपयंत्र्याने लाचेची रक्कम स्वीकारली यावेळी सापळा रचून पथकाने त्यांना रंगेहाथ पकडले. आरोपीविरुद्ध भ्रष्टाचार प्रतिबंधक (सुधारणा) अधिनियम २०१८ च्या कलम ७ अन्वये गुन्हा दाखल करण्यात आला असून पुढील तपास सुरू आहे. सदर कारवाईमुळे स्थानिक प्रशासनात खळबळ उडाली आहे.