Fact Check : कोल्डड्रिंकमध्ये व्हायरस? काय आहे व्हॉट्सअ‍ॅपवर व्हायरल होणाऱ्या मेसेजमागचं सत्य?

Viral News : सोशल मीडियावर अनेक गोष्टी फॉरवर्ड होत असतात. फॉरवर्ड होणाऱ्या बहुतांशी गोष्टी या खोट्या असतात. पण व्हायरल होत असल्याने त्या खऱ्या आहेत असे अनेकजणांना वाटते. असाच एक व्हॉट्सअ‍ॅप फॉरवर्ड मेसेज व्हायरल होत आहे. या व्हायरल मेसेजमध्ये कोल्ड ड्रिंक्समध्ये इबोला व्हायरल आढळला आहे, असे म्हटले आहे.

मिळालेल्या माहितीनुसार, व्हायरल मेसेजमध्ये भारत सरकारने नागरिकांना कोल्ड ड्रिंक्स पिणे टाळण्याचा सल्ला दिल्याचा दावा करण्यात आला आहे. कोल्ड ड्रिंक्समध्ये इबोला व्हायरल आढळल्याचेही मेसेजमध्ये म्हटले आहे. यामुळे नागरिकांमध्ये भीतीचे वातावरण निर्माण झाले आहे. या मेसेजचा पडताळा माहिती ब्युरोने केला आहे.

सोशल मीडियावर व्हायरल होणाऱ्या फॉरवर्ड मेसेची पडताळणी पीआयबीच्या फॅक्ट चेक विभागाने केली आहे. व्हायरल होणारा व्हॉट्सअ‍ॅप फॉरवर्ड मेसेज पूर्णपणे खोटा असल्याचे म्हटले आहे. याबाबत पीआयबीने ट्विट केले आहे. आरोग्य आणि कुटुंब कल्याण मंत्रालय (MoHFW_INDIA) कोल्ड ड्रिंक्स पिणे टाळण्याबात किंवा इबोला व्हायरसबाबत कोणतेही सल्ला पत्रक जारी केलेले नाही, असे पीआयबी फॅक्ट चेक विभागाने म्हटले आहे. नागरिकांनी अफवांवर विश्वास ठेवू नये आणि हा मेसेज फॉरवर्ड करु नये असेही त्यांनी म्हटले आहे.

इबोला हा प्रामुख्याने आफ्रिकन देशांमध्ये आढळणारा संसर्गजन्य रोग आहे. भारतात सध्या अशा कोणत्याही प्रकरणाची नोंद झालेली नाही. आरोग्य मंत्रालय नेहमीच संसर्गजन्य आजारांबाबत जागरूकता मोहीम राबवत असते. पण मंत्रालयाकडून जर महत्त्वाचे सल्लापत्रक जारी केले गेले, तर ते मंत्रालयाच्या अधिकृत वेबसाईट, सोशल मीडिया अकाउंट आणि प्रमुख वृत्तसंस्थांद्वारे प्रसिद्ध केले जाते.