Sameer Wankhede : समीर वानखेडे भडकले! शाहरुख खान, नेटफ्लिक्सवर मानहानीचा खटला, २ कोटींची केली मागणी

Sameer Wankhede sues Red Chillies, Netflix over 'Ba**ds of Bollywood :अभिनेता शाहरुख खान आणि त्याची पत्नी गौरी खान यांची कंपनी रेड चिलीज एंटरटेनमेंट प्रायव्हेट यांच्या विरोधात आयआरएस अधिकारी समीर वानखेडे यांनी मानहानीचा खटला दाखल केला आहे. या खटल्यात कायमस्वरूपी आणि अनिवार्य मनाई आदेश, घोषणा आणि नुकसान भरपाईची मागणी करण्यात आली आहे. रेड चिलीज व्यतिरिक्त ओटीटी प्लॅटफॉर्म नेटफ्लिक्स आणि इतर पक्षांविरुद्ध समीर वानखेडे यांनी खटला दाखल केला आहे.

शाहरुख खानविरुद्ध मानहानीचा खटला दाखल

रेड चिलीज निर्मित आणि नेटफ्लिक्सवर प्रसारित 'बॅड्स ऑफ बॉलिवूड' ही वेब सिरीज खोटी, दुर्भावनापूर्ण आणि बदनामी करणारी आहे. ही सिरीज अंमली पदार्थांविरोधी संस्थांची नकारात्मक आणि दिशाभूल करणारी प्रतिमा सादर करते. यामुळे कायदा अंमलबजावणीवरील जनतेचा विश्वास कमी होत आहे, असा आरोप समीर वानखेडे यांनी केला आहे. त्यांनी 'समीर वानखेडे विरुद्ध आर्यन खान हा खटला मुंबई उच्च न्यायालय आणि मुंबईतील एनडीपीएस विशेष न्यायालयात प्रलंबित असताना ही वेब सिरीज जाणूनबुजून त्यांची प्रतिष्ठा कलंकित करण्यासाठी तयार करण्यात आली आहे', असे म्हटले आहे.

'बॅड्स ऑफ बॉलिवूड' या वेब सिरीजमधील एका पात्राला सत्यमेव जयते असे म्हणत अश्लील हावभाव करताना दाखवण्यात आले आहे. हे कृत्य राष्ट्रीय चिन्हाचा अपमान आहे, यातून राष्ट्रीय सन्मानाचा अपमान प्रतिबंधक कायदा, १९७१ चे गंभीर उल्लंघन करणारे आहे, असे समीर वानखेडे यांनी म्हटले आहे. त्यांनी सिरीजच्या निर्मात्यांवर मानहानीचा खटला दाखल केला आहे.

वेब सिरीजमधील मजकूर माहिती तंत्रज्ञान कायदा आणि भारतीय दंड संहितेच्या काही कलमांचे उल्लंघन करतो. सिरीज अश्लील आणि आक्षेपार्ह सादरीकरणाद्वारे राष्ट्रीय भावना दुखावण्याचा प्रयत्न करते. वानखेडे यांनी याचिकेत २ कोटी रुपयांची नुकसानभरपाईची मागणी केली आहे. ही रक्कम टाटा मेमोरियल कॅन्सर हॉस्पिटलमध्ये दान केली जाणार असल्याचे वानखेडे यांनी स्पष्ट केले आहे.