Crime : भाजप नेत्याच्या हत्या प्रकरणात मोठी अपडेट; माजी आमदारासहित १२ जणांना अटक

ओडिशा पोलिसांनी बुधवारी भाजप नेते आणि वकील पीताबास पांडा यांच्या हत्या प्रकरणाबाबत मोठी अपडेट दिली. या प्रकरणात ब्रम्हपूरचे माजी आमदार, बीजू जनता दलाचे गंजम जिल्हाध्यक्ष बिक्रम पांडा यांच्यासहित १२ लोकांना पोलिसांनी अटक केली. मात्र, बीजेडने या अटकेचा विरोध केला होता. या प्रकरणातील खऱ्या आरोपींना वाचवण्याचा प्रयत्न सुरु आहे, असा आरोप बीजेडीने केला होता. तर बीजेडी आरोपींना संरक्षण देत आहे, असा आरोप भाजपने केला.

ब्रम्हपूरचे पोलीस अधिकारी विवेक एम यांनी माध्यमांना सांगितलं की, राजकीय वैर,वैयक्तिक वैमनस्यातून पांडा यांची हत्या करण्यात आली आहे'. या प्रकरणात अटक करण्यात आलेल्या आरोपींमध्ये ब्रम्हपूरचे माजी महापौर सिबा शंकर दास(पिंटू), नगरसेवक मलय बिशोयी आणि इतर साथीदारांचा समावेश आहे.

ज्येष्ठ वकील आणि ओडिशा स्टेट बार कौन्सिलचे सदस्य पिताबास पांडा यांची ६ ऑक्टोबर रोजी ब्रम्हपूर येथील त्यांच्या निवासस्थानाजवळ गोळ्या झाडून हत्या करण्यात आली. या हत्याकांडाबाबत सांगण्यात आलं की, पिताबास पांडा यांची हत्या करण्यासाठी ५० लाख रुपयांचा व्यवहार झाला होता. यासाठी गोळीबार करणाऱ्यांना १० लाख रुपये देण्यात आले होते.

बीजेडी नेत्या प्रमिला मलिक यांनी या प्रकरणात विक्रम पांडा यांना क्लीन चिट दिली आहे. पोलीस खऱ्या गुन्हेगाराला वाचवण्यासाठी ब्रम्हपूरच्या माजी आमदाराला अटक केली जात आहे, असा आरोप त्यांनी केला.

दुसरीकडे भाजपचे ज्येष्ठ नेते, मंत्री सुरेश पुजारी यांनी बीजेडीवर गुन्हेगारांना संरक्षण देण्याचा आरोप केला. ते म्हणाले, 'गुन्हेगार आणि गुन्हेगारीला पाठिंबा देऊन बीजेडी ओडिशावर अन्याय करत आहे'.