Heatwave: गर्मीने सारे बेहाल! उष्माघाताची बातमी देताना अँकरला भोवळ; प्रक्षेपण अर्ध्यातच थांबवलं, Video

उन्हाळा सुरु झाला आहे. उकाड्याचा नागरिकांना प्रचंड त्रास सहन करावा लागत आहे. अनेक राज्यात तापमान तर ४५ अंश सेल्सियसपर्यंत आहे. यामुळेच देशातील लोकांना उष्माघाताचा त्रास सहन करावा लागत आहे. असाच त्रास कोलकत्यामध्ये दूरदर्शन शाखेत अँकरला सहन करावा लागला आहे.

कोलकत्यातील दूरदर्शन शाखेतील अँकर उष्म लहरींचे अपडेट्स वाचत असतानाच बेशुद्ध झाल्याची घटना घडली आहे.

लोपामुद्रा असे या अँकरचे नाव आहे. अँकर टीव्हीवर उष्माघातासंबंधित बातम्यांचे वाचन करत होत्या. त्याचदरम्यान त्या बेशुद्ध झाल्या. लोपामुद्रा या दूरदर्शन पश्चिम बंगालच्या शाखेत काम करतात. उन्हाच्या त्रासाने त्यांना त्रास झाल्याचे सांगण्यात येत आहे.

लोपामुद्रा सिन्हा यांनी फेसबुकच्या माध्यमातून आपल्या तब्येतीबाबत माहिती दिली आहे. त्यांनी सांगितले की, लाईव्ह न्यूज वाचताना माझे ब्लड प्रेशर कमी झाले आणि मी बेशुद्ध पडली. मला खूप दिवसापासून अस्वस्थ वाटत होते. पाणी प्यायल्यावर मला बरं वाटेल असं वाटलं होतं. मात्र, तसं काहीच झालं नाही.

लोपामुद्रा यांनी सांगितले की, मी कधीच बातम्या वाचताना पाणी घेऊन बसत नाही. बातमी १० मिनिटांची असो किंवा अर्ध्या तासाची. मी फ्लोअर मॅनेजरकडे बोट दाखवून पाण्याची बाटली मागितली. परंतु मी पाणी पिऊ शकले नाही. कारण मी ऑन एअर होती.

उष्माघाताचा त्रास देशासह राज्यात अनेक ठिकाणी होत आहे. त्यामुळे नागरिकांनी खूप काळजी घ्यायला हवी. उन्हाळ्यात सतत पाणी पिऊन स्वतः ला हायड्रेट ठेवायला हवे. उन्हाळ्यात शक्यतो दुपारच्या वेळी घराबाहेर पडू नये. घराबाहेर पडल्यास तुम्ही तुमच्याजवळ काही गोड पदार्थ ठेवावे. जेणेकरुन चक्कर आल्यावर तुम्ही ते खाऊ शकतात.