K. Kavitha: BRSच्या नेत्या के.कविता यांच्या अडचणीत वाढ, ईडीनंतर आता सीबीआयने केली अटक

Delhi Liquor Scam:

दिल्ली दारू घोटाळ्याशी (Delhi Liquor Scam) संबंधित मनी लाँड्रिंग प्रकरणात (Money Laundering Case) अटकेत असलेल्या भारत राष्ट्र समिती म्हणजेच बीआरएसच्या नेत्या के. कविता (BRS Leader K. Kavitha) यांच्या अडचणीमध्ये वाढ झाली आहे. ईडीनंतर आता सीबीआयनेही अबकारी धोरण घोटाळ्याप्रकरणी  (Delhi Excise Policy Case)  कारवाई केली आहे. याप्रकरणी सीबीआयने के. कविता यांना अटक केली आहे. दिल्ली दारू घोटाळा प्रकरणी सीबीआयने (CBI) शनिवारी 6 तास कविता यांची चौकशी केली. त्यानंतर सीबीआयने आज तिहार तुरुंगातून के. कविता यांना अटक केली.

दिल्ली दारू घोटाळ्याशी संबंधित मनी लाँड्रिंग प्रकरणात ईडीने कविता यांच्यावर गुन्हा दाखल केला होता. कविता यांना अटक करण्यात आली आहे. याप्रकरणात बीआरएस नेता सध्या तिहार तुरुंग क्रमांक 6 मध्ये न्यायालयीन कोठडीत आहे. कविता यांना ईडीने १५ मार्च रोजी अटक केली होती. 26 मार्च रोजी राऊस ॲव्हेन्यू कोर्टाने के. कविता यांना न्यायालयीन कोठडी सुनावली. त्यानंतर त्यांची रवानगी तिहार तुरुंगात करण्यात आली होती.

सीबीआयने बुधवारी दिल्ली न्यायालयात सांगितले की, त्यांनी कथित दिल्ली अबकारी धोरण घोटाळ्याशी संबंधित भ्रष्टाचार प्रकरणात बीआरएस नेत्या के. कविता यांची तिहार सेंट्रल जेलमध्ये चौकशी करण्यात आली. ५ एप्रिल रोजी न्यायालयाने सीबीआयला कविताची तुरुंगात चौकशी करण्याची परवानगी दिली होती. त्या आदेशाला कविता यांनी आव्हान देखील दिले आहे.

सीबीआयने ईडी आणि सीबीआय प्रकरणांसाठी विशेष न्यायाधीश कावेरी बावेजा यांना कळवले होते की, न्यायालयाच्या आदेशानंतर त्यांनी बीआरएसच्या नेत्या कविता यांची 6 एप्रिल रोजी चौकशी केली होती. कोठडीत चौकशीची विनंती करणाऱ्या सीबीआयच्या याचिकेच्या संदर्भात कविता यांच्या वतीने हजर असलेले वकील नितीश राणा यांनी दाखल केलेल्या अर्जाला उत्तर देताना केंद्रीय तपास यंत्रणेने हा युक्तिवाद केला. सीबीआयने न्यायालयाला सांगितले की, त्यांनी कविता यांची आधीच चौकशी केली आहे. त्यामुळे ते त्यांच्या अर्जावर कोणतेही उत्तर दाखल करणार नाही. वकील नितेश राणा यांनी मात्र सीबीआयच्या याचिकेविरुद्ध कविता यांच्या अर्जावर आपण युक्तिवाद करू इच्छित असल्याचे न्यायालयाला सांगितले.

दरम्यान, या प्रकरणी पुढील सुनावणी 26 एप्रिल रोजी होणार आहे. ईडीने के कविताला 15 मार्च रोजी कथित अबकारी धोरण घोटाळ्याशी संबंधित मनी लॉन्ड्रिंग प्रकरणात अटक केली होती. दिल्ली दारू घोटाळ्याप्रकरणी ईडीने अरविंद केजरीवाल यांनाही अटक केली आहे. याआधी आपचे नेते मनीष सिसोदिया आणि संजय सिंह यांनाही अटक करण्यात आली आहे.