Fire Death: अग्नितांडव! ५ मजली रेस्टॉरंट आगीत भस्मसात; २० जणांचा होरपळून मृत्यू, थरकाप उडवणारा व्हिडिओ समोर

Delhi Malviya Nagar restaurant fire latest death Toll updates : राजधानी दिल्लीमध्ये बुधवारी सकाळी ५ मजली इमारतीला भीषण आग लागली. मालवीय नगर परिसरात लागलेल्या या अग्नितांडवात रेस्टॉरंट भस्मसात झाले. या दुर्घटनेत २० जणांचा होरपळून मृत्यू झाल्याची माहिती स्थानिक अधिकाऱ्यांनी दिली. २५ पेक्षा जास्त जण जखमी झाल्याचेही समजतेय. त्यांच्यावर रूग्णालयात उपचार सुरू आहेत. आज साखील ९ वाजताच्या सुमारास ५ मजली रेस्टॉरंटला आग लागल्याची माहिती मिळाली. पंतप्रधान नरेंद्र मोदी यांनी या दुर्घटनेबाबत दुख व्यक्त केले आहे. मृतांच्या नातेवाईकांना मदतही मोदींनी जाहीर केली आहे.

दिल्लीच्या मुख्यमंत्री रेखा गुप्ता यांनी जीवितहानीबद्दल दुःख व्यक्त केले आणि सरकार परिस्थितीवर बारकाईने लक्ष ठेवून असल्याचे सांगितले. पीटीआय या वृत्तसंस्थेनुसार, दुर्घटनेत मृत्यू झालेल्यांपैकी बरेच जण परदेशी नागरिक आहेत. बचाव मोहिमेदरम्यान इमारतीमधून एकूण ३७ जणांना वाचवण्यात आले, अशी माहिती अधिकाऱ्यांनी दिली. त्या सर्वांना सेंट्रलाइज्ड ॲक्सिडेंट अँड ट्रॉमा सर्व्हिसेस (CATS) च्या रुग्णवाहिकांमधून रुग्णालयात नेण्यात आले. दरम्यान, याआधी तळघरातून तीन जणांना बाहेर काढून रुग्णालयात दाखल करण्यात आल्याचे अधिकाऱ्यांनी सांगितले होते.

पंतप्रधान मोदींनी मालवीय नगर आग दुर्घटनेतील जीवितहानीबद्दल शोक व्यक्त केला. त्यांनी प्रत्येक मृताच्या कुटुंबीयांना २ लाख रुपये आणि जखमींना ५०,००० रुपयांची सानुग्रह मदत जाहीर केली आहे. आग लागल्याची माहिती मिळताच अग्निशमन दलाच्या १० पेक्षा जास्त गाड्या घटनास्थळी दाखल झाल्या. आगीवर सध्या नियंत्रण मिळवण्यात आले असून कुलिंगचे काम सुरू झाले आहे. त्याशिवाय इमारतीत आणखी कुणी अडकले आहे का? याचाही तपास केला जात आहे.

"साडेनऊच्या सुमारास आम्ही पाहिलं की इथे खूप भीषण आग लागली होती. त्यावेळी मी आणि माझा मित्र स्कूटरवर होतो, सगळीकडे आग भडकली होती आणि लोक इमारतीवरून इकडून तिकडून उड्या मारत होते. आम्ही सुमारे ५ लोकांना उड्या मारताना पाहिलं. एका व्यक्तीचा पायही मोडला. इथला संपूर्ण रस्ता बंद झाला होता. तिथे गर्दी जमली होती, असे ओम नावाचा एक स्थानिक रहिवाशाने सांगितले."