Unnao Case : बलात्कार प्रकरणात भाजपच्या माजी आमदाराला दिलासा; हायकोर्टाकडून जन्मठेपेच्या शिक्षेला स्थगिती

उत्तर प्रदेशच्या उन्नाव बलात्कार प्रकरणात जन्मठेपेची शिक्षा भोगत असलेल्या माजी आमदार कुलदीप सिंह सेंगरला दिल्ली हायकोर्टाने मोठा दिलासा दिला आहे. कोर्टाने सेंगर याच्या जन्मठेपेच्या शिक्षेला स्थगिती देत जामीन मंजूर केला आहे.

कोर्टाने आदेशात सेंगरला दिलेली जन्मठेपेची शिक्षा स्थगित केली आहे. सेंगरला १५ लाखांचा वैयक्तिक जात मुचलका आणि तिघांच्या जामिनीवर सोडलं आहे. कोर्टाने सेंगरला जामीन देताना काही अटी देखील घातल्या आहेत. जामिनानुसार, सेंगरला पीडित मुलीच्या घराच्या 5 किलोमीटरच्या हद्दीत जाता येणार नाही.

तसेच सेंगरला आता त्याचा पासपोर्ट देखील कोर्टात जमा करावा लागणार आहे. त्याला प्रत्येक सोमवारी पोलीस स्टेशनला हजेरी लावावी लागणार आहे. त्याचबरोबर कोर्टाने सेंगरला पीडित कुटुंबाला न धमकावण्याचे आदेश दिले आहेत.

काय आहे संपूर्ण प्रकरण?

उन्नाव बलात्कार प्रकरण हे २०१७ सालातील आहे. उन्नावमधील एका अल्पवयीन मुलीने तत्कालीन भाजप आमदार कुलदीप सिंह सेंगरवर बलात्काराचा आरोप केला होता. या प्रकरणात न्याय मिळत नसल्याचे दिसलं. तर तिने मुख्यमंत्र्याच्या घरासमोर आत्मदहनाचा प्रयत्न केला होता. यानंतर पीडित मुलीच्या वडिलांचा पोलीस कस्टडीत मृत्यू झाला होता. पीडित मुलीचा संशयास्पद अपघात झाल्यानंतर संपूर्ण देशभर खळबळ उडाली होती.

सुप्रीम कोर्टाने हस्तक्षेपानंतर संपूर्ण प्रकरण दिल्ली हस्तांतरित केलं. या प्रकरणी २०१९ साली दिल्लीतील कोर्टाने कुलदीप सेंगरला दोषी ठरवत जन्मठेपेची शिक्षा सुनावली. त्याच्यावर २५ लाख रुपयांचा दंड देखील ठोठावला होता. सेंगरने मिळालेल्या शिक्षेविरोधात हायकोर्टात धाव घेतली होती. याच याचिकेवर दिल्ली हायकोर्टात सुनावणी झाली. या सुनावणीत सेंगरला मिळालेल्या जन्मठेपेच्या शिक्षेला स्थगिती दिली आहे.