Shocking : भयंकर! ५०० हून अधिक तरुणींचे खासगी व्हिडिओ अन् फोटो; व्हायरल करण्याची धमकी देऊन कोट्यवधींना लुटलं

सायबर फसवणूक झाल्याचे अनेक गुन्हे पोलीस ठाण्यात दाखल होतात. कधी खरेदी करताना, कधी बनावट अ‍ॅप्सच्या माध्यमातून हे प्रकार घडतं आहेत. या विळख्यात सर्वात जास्त महिला अडकल्याची टक्केवारी आहे. अशातच आता एका तरुणाने ५०० हून जास्त तरुणींना प्रेमाच्या जाळ्यात ओढत, त्यांचे खासगी फोटो व्हायरल करण्याची धमकी देत फसवणूक केल्याची धक्कादायक घटना घडली आहे. याप्रकरणी पोलिसांनी तातडीने कारवाई करत मुख्य आरोपीला ताब्यात घेतले आहे. तसेच याप्रकरणात आणखी किती तरुणी अडकल्या आहेत? याचा तपास पोलीस करत आहेत.

मिळालेल्या माहितीनुसार, आरोपीचे नाव आनंद कुमार (वय ३५) असे आहे, तो मूळचा पश्चिम बंगालमधील उत्तर २४ परगणा जिल्ह्याचा रहिवासी आहे. आरोपी आनंदने अनेक तरुणींना डेटिंग अ‍ॅप्सच्या आणि मॅट्रिमोनिअल अ‍ॅप्सच्या माध्यमातून प्रेमाच्या जाळ्यात ओढलं. लग्नाचे वचन देत, तो स्वतःची ओळख प्रत्येक तरुणीला वेगवगेळी सांगायचा. कधी डॉक्टर, वकील, व्यवसायिक, दिगदर्शक असल्याचं सांगत तरुणींना आपल्याकडे जास्त पैसा असल्याचं खोटं सांगायचा.

त्यानंतर तरुणी जाळ्यात अडकल्या की, आरोपी त्यांच्याकडून लाखो रुपये उकळायचा. तरुणींनी पैसे देण्यास नकार दिल्यास, त्यांचेच खासगी फोटो आणि व्हिडिओ दाखवून व्हायरल करण्याची धमकी द्यायचा. त्याच्या अशा धमक्यांना घाबरून तरुणींनी देखील आरोपीला पैसे दिले. धक्कादायक म्हणजे यानंतर त्याने स्वतःहून पीडित तरुणींना तो मेल्याचे सांगितले.

याप्रकरणी एका तरुणीने पोलीस ठाण्यात २ कोटी रुपयांची फसवणूक झाल्याची तक्रार दाखल केली. तिच्या तक्रारीनंतर आनंद कुमारचे काळे धंदे जगासमोर उघडं झाले. याप्रकरणात ५०० हून अधिक तरुणींची फसवणूक झाल्याचे समोर आले आहे. तसेच आरोपी अनेक बनावट नावांनी बँक खाती चालवत होता. त्याच्यावर दिल्ली आणि गाझियाबादमध्ये यापूर्वी दोन गुन्हे दाखल आहेत. पीडित तरुणीच्या तक्रारीनंतर पोलिसांनी या सायबर चोराला बेड्या ठोकल्या आहेत. पोलीस आता या प्रकरणात पुढील तपास आणि चौकशी करत आहेत.