काँग्रेसला जोरदार धक्का; बड्या नेत्याचा तडकाफडकी राजीनामा, राजकीय वर्तुळात खळबळ

काँग्रेस पक्षासह लोकसभा मतदारसंघाचे खासदार इमरान मसूद यांना जोरदार धक्का बसलाय. इमरान मसूद यांचे जावई शायान मसूद यांनी पक्षाला रामराम ठोकला. काँग्रेस पक्षात राजीनामा दिल्यानंतर शायान यांनी थेट समाजवादी पक्षात प्रवेश केला आहे.त्यानंतर आता कुटुंबातील कलहही चव्हाट्यावर आला आहे. यासह मसूद यांच्या मतदारसंघातील वर्चस्वालाही धक्का बसल्याचं म्हटलंय जातंय.

उत्तर प्रदेशात पुढच्या विधानसभेची निवडणूक होणार आहे. त्यासाठी सर्व पक्षांकडून मोर्चेबांधणी सुरू आहे. उमेदवारीसाठी चाचपणी केली जातेय. राज्यातील अनेक मतदारसंघांमध्ये मुस्लिम मतदारांची भूमिका निर्णायक आहे. इमरान मसूद हे मुस्लिम समाजातील प्रतिष्ठित नेते मानले जातात. सहारनपूर मतदारसंघासह अन्य मुस्लिमबहुल भागात त्यांचा वरचष्मा आहे.

शायान मसूद यांनी का सोडला काँग्रेस पक्ष?

आगामी विधानसभा निवडणुकीत एकाही नातेवाईकाला उमेदवारी देणार नाही, अशी घोषणा इमरान मसूद यांनी केली होती. तर त्यांचे जवाई शायान हे विधानसभा निवडणूक लढवण्यास इच्छुक होते. त्यामुळे खासदार सासरांचा निर्णय जावयाचा जिव्हारी लागला. त्यानंतर जावाई शायान यांनी काँग्रेस पक्षाचा तडकाफडकी राजीनामा दिला. लागलीच त्यांनी अखिलेश यादव यांची भेट घेत समाजवादी पक्षात प्रवेश केला. शायान यांच्यासोबत त्यांचे वडील शाजान समूद यांनीही सायकल हाती घेतलीय.

शायान मसूद हे माजी केंद्रीय मंत्री दिवंगत काजी रशीद मसूद यांचे नातू आहेत. तर इमरान मसूद हे काजी यांचे भाचे आहेत. त्यामुळे सहारनपूर मतदारसंघात काजी आणि मसूद कुटुंबाचे वर्चस्व मानले जाते. राजकीय महत्वाकांक्षेपायी कुटुंबात कलह सुरू झालाय. याचा थेट फटका मसूद यांना बसण्याची शक्यता व्यक्त केली जातेय. इमरान मसूद यांच्यासोबत आपले वैचारिक मतभेद असल्याचे शायान यांनी म्हटलंय. त्यामुळे भविष्यात समाजवादी पक्षाकडून शायान यांना उमेदवारी दिली जाणार का, हेही पाहणे महत्वाचं ठरणार आहे.