Abhijeet Dipke : "...तो पाकिस्तानी एजंट" अभिजित दीपिकेला अटक करा, प्रसिद्ध इंफ्लुएन्सरने केली पोलिसात तक्रार

नीट पेपर फुटी प्रकरणी दिल्लीतील जंतर मंतर येथील विद्यार्थ्यांच्या आंदोलनानंतर कॉक्रोच जनता पार्टीचे संस्थापक अभिजित दिपके चांगलेच चर्चेत आले. दरम्यान आंदोलन यशस्वी झाल्यानंतर CJP बद्दल अनेक प्रश्न उपस्थित करण्यात आले. अशातच आता अभिजीत दीपके यांच्या विरोधात दिल्ली पोलिसांकडे लेखी तक्रार दाखल करण्यात आली आहे. सोशल मीडिया इन्फ्लुएन्सर फैजान अन्सारी यांनी ही तक्रार सादर करत दीपके यांच्याविरोधात एफआयआर नोंदवून तातडीने अटक करण्याची मागणी केली आहे.

डीसीपी कार्यालयाबाहेर प्रसारमाध्यमांशी बोलताना फैजान अन्सारी यांनी दावा केला की, दीपके यांच्या समर्थकांकडून त्यांच्यावर दोन वेळा हल्ला करण्यात आला असून त्यासंदर्भातील पुरावे त्यांच्या जवळ आहेत. पुणे आणि औरंगाबाद येथे झालेल्या या कथित हल्ल्यांबाबत त्यांनी स्थानिक पोलिसांकडेही गुन्हे दाखल केल्याचे सांगितले.

तक्रारीमध्ये अभिजीत दीपके यांच्यावर गंभीर आरोप करण्यात आले आहेत. त्यात त्यांना पाकिस्तानी एजंट तसेच उमर खालिद यांचे समर्थक असल्याचा दावा करण्यात आला आहे. तसेच जंतर-मंतर येथील आंदोलनासाठी काही बॉलिवूड सेलिब्रिटींना पैसे देऊन बोलावल्याचाही आरोप तक्रारीत करण्यात आला आहे. मात्र, या आरोपांना कोणताही अधिकृत दुजोरा मिळालेला नाही.

फैजान अन्सारी यांनी दीपके यांच्याविरोधात तातडीने कारवाई न झाल्यास देशातील वातावरण बिघडू शकते, असा दावाही केला. तसेच काही सेलिब्रिटींना आंदोलनात सहभागी होण्यासाठी आर्थिक मोबदला देण्यात आल्याचेही त्यांनी म्हटले आहे. तथापि, या दाव्यांबाबत कोणतेही अधिकृत पुरावे किंवा संबंधित व्यक्तींची प्रतिक्रिया समोर आलेली नाही. दरम्यान, या संपूर्ण प्रकरणावर दिल्ली पोलिसांनी अद्याप कोणतीही अधिकृत प्रतिक्रिया दिलेली नाही. तसेच अभिजीत दीपके यांनीही या आरोपांवर भूमिका मांडलेली नाही.