रस्त्यावर हजारो विषारी साप, पुराच्या पाण्यात सापांचा सुळसुळाट

पूर आला की माणसं जीव वाचवण्यासाठी पळतात... पण कल्पना करा, त्याच पुराच्या पाण्यात जर तुमच्या दिशेनं हजारो विषारी साप पोहत येत असतील तर? विचार करूनच अंगावर शहारा आला ना? पण हा कोणताही हॉलिवूड सिनेमा नाही, तर चीनमध्ये घडलेली थरारक आणि भयावह वास्तविक घटना आहे. चीनमध्ये 'मायसाक' हे वादळ आलंय... त्यामुळे पुरपरिस्थिती निर्माण होऊन गुआंगशी प्रांतात रस्त्यावर हजारो सापांचा चक्क पूर आलाय...मात्र हे साप पुराच्या पाण्यात नेमके कुठून आले? पाहूयात...

चीनमधील गुआंगशी हा भाग जगातील सर्वात मोठ्या सर्प प्रजनन केंद्रांसाठी ओळखला जातो. औषधं आणि चामड्याच्या वस्तूंसाठी इथे तब्बल 3 कोटी सरपटणारे प्राणी पाळले जातात. मात्र पुराच्या तडाख्यात मोठं सर्प पालन केंद्र पूर्णपणे वाहून गेलं...या दुर्घटनेनंतर फार्ममधून घातक कोब्रासह हजारो साप अचानक पुराच्या पाण्यात मोकळे फिरू लागलेत... पुराच्या गढूळ पाण्यातून हे हजारो साप रहिवासी भागाकडे वेगाने पोहत जातायत..

या भयंकर संकटानंतर स्थानिक प्रशासनाची मोठी धावपळ उडालीय.. सापांना पकडण्यासाठी तातडीने 10 तज्ज्ञ सदस्यांचे विशेष पथक तैनात करण्यात आले असून पथक मासेमारीची जाळी, काठ्या आणि 'स्टेन गन' सारख्या अत्याधुनिक शस्त्रांसह पुराच्या पाण्यात उतरून या विषारी सापांचा शोध घेतय...चीनमधल्या या भागातील नागरिकांना घरातून बाहेर न पडण्याचे कडक आदेश देण्यात आलेत..आधीच पुरपरिस्थितीमुळे गुआंगशी प्रांतात 26 जणांचा मृत्यू झालाय.. त्यात विषारी सापांचा पूर आल्यामुळे चीनमधील नागरिकांमध्ये दहशत पसरलीय.