Chhattisgarh News : छत्तीसगडमध्ये सुरक्षा दलांची मोठी कारवाई; तब्बल ७ दहशतवाद्यांचा खात्मा, मोठा शस्त्रसाठाही जप्त

छत्तीसगडमधील नारायणपूर-दंतेवाडा सीमा भागात सुरक्षा दलाचे जवान आणि नक्षलवाद्यांमध्ये चकमक झाली. सुरक्षा दलांच्या जवानांना पाहताच नक्षलवाद्यांनी गोळीबार सुरू केला. प्रत्युत्तरात सुरक्षा दलाने केलेल्या कारवाईत ७ नक्षलवादी ठार झाले. त्याचबरोबर या घटनेत डीआरजीचे ३ जवानही जखमी झाले आहेत. त्यांना उपचारासाठी रुग्णालयात दाखल करण्यात आले आहे.

सध्या परिसरात लपून बसलेल्या नक्षलवाद्यांचा शोध सुरू आहे. सुरक्षा दलाच्या जवानांकडून त्यांचा शोध घेतला जात आहे. छत्तीसगडच्या पूर्व बस्तर विभागातील एका गावात अनेक नक्षलवादी असल्याची माहिती सुरक्षा दलाला मिळाली होती. माहिती मिळताच सुरक्षा दलाच्या जवानांनी या परिसराला घेराव घातला.

यावेळी सुरक्षा दलाच्या जवानांना पाहताच नक्षलवाद्यांनी गोळीबार सुरू केला. सुरक्षा दलांनी प्रत्युत्तर देत गोळीबार केला, ज्यात ७ गणवेशधारी नक्षलवादी ठार झाले. हे ऑपरेशन अनेक जिल्ह्यांच्या DRG टीम आणि ४५ व्या कॉर्प्स ITBP च्या सैनिकांनी संयुक्तपणे केले. दरम्यान, सर्व मृत नक्षलवाद्यांचे मृतदेह ताब्यात घेण्यात आले आहेत.

नक्षलवाद्यांकडून मोठ्या प्रमाणात शस्त्रसाठा देखील जप्त करण्यात आला आहे. गेल्या दोन-तीन महिन्यांपासून छत्तीसगडमध्ये नक्षलवाद्यांविरोधात वेगाने कारवाई सुरू आहे. या वर्षात आतापर्यंत राज्यात सुरक्षा दलांसोबत झालेल्या वेगवेगळ्या चकमकीत १०० हून अधिक नक्षलवादी ठार झाले आहेत.

याआधी २३ मे रोजी नारायणपूर-विजापूर आंतरजिल्हा सीमेवरील जंगलात सुरक्षा दलाचे जवान आणि दहशतवाद्यांमध्ये चकमक झाली होती. या चकमकीतही जवळपास ७ नक्षलवादी ठार झाले होते, तर १० मे रोजी विजापूर जिल्ह्यात सुरक्षा दलाने १२ नक्षलवाद्यांचा खात्मा केला होता.