Chhattisgarh BJP chief Kiran Dev Singh accident latest news : उत्तर प्रदेशातील झाशी-ललितपूर राष्ट्रीय महामार्गावर तालबेहटजवळ एका भीषण रस्ता अपघातात छत्तीसगड भाजपचे प्रदेशाध्यक्ष किरण देव सिंह गंभीर जखमी झाले आहेत. मध्य प्रदेशातील दतिया येथून दर्शन घेऊन परतताना त्यांच्या इनोव्हा कारने महामार्गावरील एका ट्रकला पाठीमागून जोरदार धडक दिली. या अपघातात किरण देव सिंह आणि त्यांचा चालक गंभीर जखमी झाले असून त्यांना झाशी येथील मेडिकल कॉलेजमध्ये दाखल करण्यात आले आहे.
बुधवारी दुपारी ३ वाजता झाशी-ललितपूर राष्ट्रीय महामार्गावर छत्तीसगड भाजपचे प्रदेशाध्यक्ष किरण देव सिंह अपघातात गंभीर जखमी झाले. तालबेहटमधील टेकडी गावाजवळ त्यांच्या इनोव्हा कारची मागून एका ट्रकशी धडक झाली. धडक इतकी भीषण होती की गाडीच्या पुढील भागाचा चक्काचूर झाला.
छत्तीसगड भाजपचे प्रदेशाध्यक्ष किरण देव सिंह हे बुधवारी मध्य प्रदेशातील दातिया येथील 'मा पितांबरा पीठा'ला भेट देऊन आपल्या कुटुंबासह परत येत होते. दुपारी सुमारे ३ वाजता तळबेहट कोतवाली भागातील टेकडी गावाजवळ असलेल्या महेंद्र सिंह कॉलेजजवळ इनोव्हा कारची मागून एका ट्रकशी धडक झाली.
अपघाताचा आवाज ऐकून स्थानिकांनी मदतीसाठी धाव घेतली अन् पोलिसांना याबाबत तात्काळ माहिती दिली. दुर्घटनेची माहिती मिळताच तालबेहट पोलीस ठाण्याचे अधिकारी घटनास्थळी पोहोचले. स्थानिक लोकांच्या मदतीने गाडीत अडकलेल्या जखमींना बाहेर काढून तात्काळ रूग्णालयात दाखल केले. अपघाताची माहिती मिळताच तालबेहटचे उप-जिल्हा दंडाधिकारी अभिजीत सिंग आणि तालबेहटचे पोलीस निरीक्षक अशोक कुमार वर्मा हे देखील रुग्णालयात दाखल झाले.