Ladakh Protest : विद्यार्थ्यांच्या आंदोलनाला हिंसक वळण; भाजप कार्यालय पेटवलं, कुठे घडली घटना?

केंद्रशासित प्रदेश लडाखला पूर्ण राज्याचा दर्जा मिळावा, या मागणीसाठी स्थानिकांकडून तीव्र आंदोलन होत आहे. या आंदोलनासाठी विद्यार्थी रस्त्यावर उतरले आहेत. आंदोलनादरम्यान विद्यार्थी आणि पोलिसांमध्ये बाचाबाची झाला. त्यानंतर आंदोलक विद्यार्थ्यांनी लेहमधील भाजप कार्यालय पेटवलं. तर सीआरपीएफच्या गाड्या देखील पेटवण्यात आल्या आहेत.

लडाखला पूर्ण राज्याचा देण्याच्या मागणीसाठी सोनम वांगचुक गेल्या १५ दिवसांपासून आमरण उपोषणावर आहेत. लडाखच्या लेह शहारात आज सकाळी आंदोलक आणि पोलिसांमध्ये राडा झाला. त्यानंतर आंदोलकांनी पोलिसांवर दगडफेक केली. सीआरपीएफच्या गाड्या देखील पेटवून दिल्या. या आंदोलनाला पहिल्यांदा हिंसक वळण लागल्याचं सांगण्यात येत आहे.

लडाखला राज्याचा दर्जा मिळावा आणि सहाव्या अनुसूचीमध्ये सामावेश व्हावा, यासाठी आंदोलन सुरु आहे. या आंदोलनाला बुधवारी १४ दिवस पूर्ण झाले. या आंदोलनादरम्यान दोन महिला बेशुद्ध झाल्या. त्यानंतर त्यांना तातडीने रुग्णालयात दाखल करण्यात आलं.

अंचुक आणि अंचुक डोल्मा या दोन महिला बेशुद्ध झाल्या होत्या. त्यांना जवळील एका रुग्णालयात दाखल करण्यात आलं. यावेळी लेह हिल परिषदेच्या इमारतीवर दगडफेक करण्यात आली. घटनास्थळी परिस्थिती नियंत्रणात आणण्यासाठी आता सुरक्षा दलाला तैनात करण्यात आलं आहे.

आंदोलकांनी लेहमधील भाजप कार्यालयावर देखील हल्ला केला. काहींनी सुरक्षाकर्मचाऱ्यांवरही दगडफेक केली. तर काही आंदोलकांनी भाजपचं कार्यालयच पेटवून दिलं. त्यानंतर लडाखमधील राजकीय वर्तुळात एकच खळबळ उडाली आहे.

आंदोलकांच्या म्हणण्यानुसार, केंद्र सरकारने याचा निर्णय ६ ऑक्टोबर रोजी घेणार असल्याचं बोललं आहे. मात्र, केंद्र सरकारने लवकरात लवकर निर्णय घ्यावा, अशी आंदोलकांची मागणी आहे. लडाखमधील लोक अधिक वेळ वाट पाहू शकत नाही, असं आंदोलकांचं म्हणणं आहे.

गेल्या दोन आठवड्यापासून आंदोलन सुरु आहे. यात पुरुष, महिला आणि युवकांचा मोठ्या प्रमाणात समावेश आहे. आंदोलकाकडून लडाखला संविधानिक संरक्षण आणि राजकीय अधिकारांची मागणी केली जात आहे.