Bhiwandi Nizampur Municipal Corporation : भिवंडी महापालिकेवर कोणाचा झेंडा फडकणार? मुस्लिम मते गेमचेंजर ठरणार

फैय्याज शेख, साम टीव्ही

भिवंडी महानगरपालिका क्षेत्रातही निवडणुकीची रणधुमाळी सुरु झाली आहे. सर्व राजकीय पक्षांनी निवडणुकीसाठी मोर्चेबांधणी सुरु केली आहे. गेल्या ३ वर्षांहून अधिक प्रशासनाचं राज्य असलेल्या भिवंडी महापालिकेतील राजकीय नेत्यांनी निवडणुकीसाठी बैठकांचा सपाटा लावला आहे. भिवंडी-निजामपूर महानगरपालिका म्हणजे भिवंडी आणि निजामपूर या दोन्ही शहरावर कोणाची सत्ता येणार, याकडे साऱ्यांचं लक्ष असणार आहे.

भिवंडी महानगरपालिका निवडणूक मागच्या वेळी 2017 साली पार पडली. यावेळी काँग्रेस,भाजप , शिवसेना, समाजवादी पार्टी, कोणार्क आघाडी आणि अपक्ष असे उमेदवार निवडणूक रिंगणात होते. या 2017 सालच्या निवडणुकीत सर्वात जास्त म्हणजे काँग्रेस पक्षाला बहुमत मिळाले होते. काँग्रेस पक्षाचे महापालिकेत ४७ जागा जिंकत स्पष्ट बहुमत मिळवलं होतं.

या निवडणुकीत भाजपचे 19 , तत्कालीन शिवसेना, 12 समाजवादी पार्टी 2, कोणार्क आघाडी 4 तर अपक्ष 6 उमेदवार निवडून आले होते. यामुळे भिवंडीच्या महापालिकेवर काँग्रेसचा महापौर तर शिवसेनेचा उपमहापौर अशी आघाडी करून महापालिकाचा कारभार चालवला होता.

पुढे अडीच वर्षानंतर काँग्रेसच्या 18 नगरसेवकांनी बंडखोरी केली होती. त्यानंतर भाजप आणि कोणार्क आघाडी यांची युती झाली. दोघांच्या युतीनंतर कोणार्क आघाडीचा महापौर झाला होता. यानंतर महाराष्ट्रात राजकीय घडामोडी झाल्या. शिवसेना फुटीनंतर भिवंडीतील सर्व नगरसेवक शिंदे गटात गेले. या निवडणुकीत महायुती किंवा महाविकास आघाडी असी युती होईल किंवा नाही हे सांगू शकत नाही. मात्र भिवंडी महानगरपालिकेत मुस्लिम मतदार मोठ्या प्रमाणात आहेत. त्याचा फायदा येत्या निवडणुकीत काँग्रेसला फायदा होऊ शकतो.

सध्याचे आमदार कोण?

भिवंडी पूर्व विधानसभा : रईस शेख (समाजवादी पक्ष)

भिवंडी पश्चिम विधानसभा : महेश चौगुले (भाजप)

भिवंडी ग्रामीण विधानसभा : शांताराम मोरे (शिंदे गट)

तिन्ही विधानसभा मतदारसंघ महानगरपालिकेच्या प्रशासनात येतात. त्यामुळे या तिन्ही आमदारांच्या भूमिका, स्थानिक पातळीवर त्यांची पकड महत्त्वाची ठरणार आहे. शिवसेनेच्या फुटीनंतर भिवंडीतील काही नगरसेवकांनी शिंदे गटात प्रवेश केलाय. त्यामुळे येणाऱ्या निवडणुकीत शिंदे गटाचा प्रभाव जाणवण्याची शक्यता आहे. मात्र भिवंडी काँग्रेस पक्षाचा पारंपरिक बालेकिल्ला मानला जातो. त्यामुळे काँग्रेस भिवंडीत पुन्हा जोरदार मुसंडी मारेल का, हे पाहणे औत्सुक्याचं ठरणार आहे.