Bihar Election 2025 : मोठी बातमी! महाराष्ट्रातील भाजपच्या बड्या नेत्यावर बिहारच्या निवडणुकीची जबाबदारी

बिहार राज्यच नव्हे तर पुढील वर्षी पश्चिम बंगाल आणि तामिळनाडू राज्यात विधानसभा निवडणुका होणार आहेत. या विधानसभा निवडणुकीसाठी भाजपने जोरदार तयारी सुरु केली आहे. भाजपने पश्चिम बंगाल विधानसभा निवडणुकीसाठी केंद्रीय मंत्री भूपेंद्र यादव यांची निवडणूक प्रभारी म्हणून नियुक्ती करण्यात आली आहे. बिप्लब कुमार देब यांना सहप्रभारी म्हणून जबाबदारी देण्यात आली आहे.

भाजपने तामिळनाडू विधानसभा निवडणुकीसाठी बैजयंत पांडा यांची प्रभारी म्हणून नियुक्ती करण्यात आली आहे. तर भाजप नेते, केंद्रीय मंत्री मुरलीधार मोहोळ यांची बिहार विधानसभा निवडणुकीसाठी सहप्रभारी म्हणून नियुक्ती करण्यात आली आहे.

भाजपचे राष्ट्रीय महासचिव अरुण सिंह यांनी पत्र जारी केलं. त्यांनी तिन्ही राज्याच्या निवडणुकीसाठी प्रभारी आणि सहप्रभारी यांची नियुक्ती केली आहे. तर आगामी बिहार विधानसभा निवडणुकीसाठी भाजपचे राष्ट्रीय अध्यक्ष जेपी नड्डा यांनी केंद्रीय मंत्री धर्मेंद्र प्रधान यांची प्रभारी म्हणून नेमणूक केली. तर सीआर पाटील आणि केशव मौर्य यांची सहप्रभारी म्हणून नियुक्ती करण्यात आली आहे.

कोण आहेत मुरलीधर मोहोळ?

मुरलीधर मोहोळ यांचा नगरसेवक, महापौर ते केंद्रीय मंत्री असा राजकीय प्रवास राहिला आहे. मोहोळ यांची खासदारकीची पहिली टर्म आहे. त्यांची मोदी सरकारमध्ये सहकार आणि नागरी विमान वाहतूक राज्यमंत्री म्हणून नियुक्ती करण्यात आलीये.