माजी मुख्यमंत्र्यांना मोठा झटका; ७ खासदारांच्या भाजप प्रवेशाला मंजुरी, सत्ताधाऱ्यांची ताकद आणखी वाढणार

माजी मुख्यमंत्री अरविंद केजरीवाल यांना मोठा धक्का बसला आहे. राज्यसभेचे सभापती सीपी राधाकृष्णन यांनी आम आदमी पक्षाच्या ७ बंडखोर खासदारांना भाजप प्रवेशासाठी मंजुरी दिली आहे. काही दिवसांपूर्वी 'आप'ची साथ सोडल्याचे जाहीर केले होते. 'आप'मधून बाहेर पडल्यानंतर बंडखोरांची खासदारकी रद्द करण्याची मागणी करण्यात आली होती. या खासदारांशी संबंधित राज्यसभा सचिवालयाने अधिसूचना जारी केली आहे.

आम आदमी पक्षाचे ७ खासदारांनी भाजपमध्ये प्रवेश केल्याने सत्ताधाऱ्यांची राज्यसभेत ताकद वाढली आहे. राज्यसभेत भाजप खासदारांची संख्या ११३ वर पोहोचली आहे. तर मागील आठवड्यात ७ खासदारांनी केजरीवाल यांची साथ सोडली. त्यामुळे 'आप'कडे तीनच खासदार राहिले आहेत. 'आप'मधून भाजपमध्ये प्रवेश करणाऱ्या ७ खासदारांपैकी ६ खासदार हे पंजाबमधून राज्यसभेवर पोहोचले आहेत.

मागच्या आठवड्यात सोडला होता पक्ष

आम आदमी पक्षाला मागील आठवड्यातील शुक्रवारमध्ये मोठा धक्का बसला. राघव चढ्ढा, हरभजन सिंह, अशोक मित्तल, संदीप पाठक, विक्रम साहनी, राजेंद्र गुप्ता आणि स्वाती मालीवाल यांनी केजरीवाल यांची साथ सोडली. अरविंद केजरीवाल यांच्या नेतृत्वातील आम आदमी पक्ष सिद्धांत विसरला आहे. आम आदमी पक्षाचे खासदार बलबीर सीचवेल यांनी दावा केला आहे की, बंडखोर खासदारांनी मला देखील भाजप प्रवेशाची ऑफर दिली होती. परंतु त्यांना नकार दिला'.

आम आदमी पक्षाचे खासदार संजय सिंह यांनी रविवारी सभापती राधाकृष्ण यांना पत्र पाठवून ७ खासदारांना अपात्र करण्याची मागणी केली. आम आदमी पक्षाची साथ सोडणाऱ्या ७ खासदारांना अपात्र करण्यासाठी खासदार संजय सिंह यांनी प्रयत्न केले. परंतु त्यांचे प्रयत्न फोल ठरले. राज्यसभेचे सभापती सीपी राधाकृष्णन यांनी सातही खासदारांना भाजप प्रवेशासाठी मंजुरी दिली. संजय सिंह यांनी सुप्रीम कोर्टाच्या दोन प्रकरणाचा संदर्भ दिला होता. उत्तराखंड आणि अरुणाचल प्रदेशातील संबंधित प्रकरणात सुप्रीम कोर्टाने बंडखोरांना अपात्र केलं आहे, असे संजय सिंह यांनी सांगितले.