Agra Accident: हृदयद्रावक घटना! लग्राला जाताना भीषण अपघात; नवरदेवाच्या भावासह ५ ठार

दिल्ली|ता. २२ एप्रिल २०२४

आग्रामधून एक भीषण अपघाताची घटना समोर आली आहे. आग्राच्या यमुना एक्स्प्रेसवेवर भरधाव कार डिवाडरला धडकून उलटल्याने भीषण अपघात झाला. यामध्ये ५ जणांचा जागीच मृत्यू झाला. तर तीन जण जखमी झाले आहेत. अपघातग्रत वाहनांमधील सर्व जण लग्न समारंभासाठी असताना ही दुर्दैवी घटना घडली.

याबाबत सविस्तर माहिती अशी की, आग्रा येथे कार दुभाजकाला धडकून पलटी होऊन पाच जणांचा मृत्यू झाला. या अपघातात अन्य तिघे जखमी झाले. गाडीमधील सर्वजण शनिवारी रात्री उशिरा लग्न समारंभासाठी ग्रेटर नोएडाहून बिहारमधील देवरियाला जात होते. याचवेळी एतमादपूर पोलीस स्टेशन हद्दीतील यमुना एक्स्प्रेसवेवरील कुबेरपूर वळणावर भरधाव कार दुभाजकावर आदळून भीषण अपघात झाला.

या घटनेची माहिती मिळताच स्थानिकांसह पोलिसांनी अपघातस्थळी धाव घेतली. दुर्घटनेतील जखमींना एसएन मेडिकल कॉलेज आणि हॉस्पिटलमध्ये पाठवण्यात आले आहे. गाडीचा अचानक टायर फुटल्याने हा अपघात झाल्याचे सांगण्यात येत आहे.

लग्नघरात शोककळा!

हा अपघात इतका भीषण होता की गाडीच्या पुढच्या भागाचा अक्षरशः चक्काचूर झाला. दरम्यान, या अपघातातील मृतांमध्ये नवरदेवाच्या भावाचाही समावेश आहे. रविवारी हा विवाह सोहळा पार पडणार होता. त्याआधीच काळाने घाला घातल्याने हळहळ व्यक्त होत आहे. पोलीस या प्रकरणाचा अधिक तपास करत आहेत.