अजित पवारांच्या NCP च्या माजी आमदाराला जिवे मारण्याची धमकी, विमानतळावर पोलिसांनी ठोकल्या बेड्या

संजय गडदे, मुंबई प्रतिनिधी

Man Threatening NCP's Zeeshan Siddiqui : राष्ट्रवादी काँग्रेसचे नेते आणि माजी आमदार झीशान सिद्दीकी यांना धमकीचे ईमेल पाठवणाऱ्या आरोपीला अखेर मुंबई पोलिसांनी अटक केली आहे. त्रिनिदाद आणि टोबॅगो या देशातून भारतात परतत असताना, मुंबई आंतरराष्ट्रीय विमानतळावर त्याला ताब्यात घेण्यात आलं. दिलशाद नौशाद खान असं अटकेत घेतलेल्या आरोपीचं नाव असून, त्याच्याविरोधात लुकआउट सर्क्युलर जारी करण्यात आलं होतं.

एप्रिल महिन्यात झीशान सिद्दीकी यांना ईमेलद्वारे १० कोटी रुपयांची खंडणी मागण्यात आली होती. खंडणी न दिल्यास, "वडिलांसारखी हत्या करीन" अशी धमकी त्याने दिली होती. या धमकीमुळे राजकीय वर्तुळात खळबळ उडाली होती. यानंतर झीशान सिद्दिकी यांनी स्वतः पोलीस आयुक्त यांची भेट घेऊन तक्रार देखील केली होती.

दिलशादने त्या ईमेलमध्ये स्वत:ला ‘डी कंपनी’चा सदस्य असल्याचं सांगितलं होतं. प्रकरण गंभीर असल्याने, मुंबई पोलिसांनी इंटरपोलची मदत घेऊन आरोपीचा माग काढला. शुक्रवारी रात्री, दिलशाद भारतात परतताच मुंबई विमानतळावर त्याला ओळखून ताब्यात घेण्यात आलं. आता पोलिस त्याच्याकडून अधिक तपास करत असून, या धमकीमागे कुणाचा हात आहे का याचा शोध घेतला जात आहे.