Hagawane Family : हगवणे कुटुंबाचे पाय खोलात, थोरल्या सुनेच्या आरोपांची चौकशी होणार

Vaishnavi Hagawane : वैष्णवी हगवणे मृत्यू प्रकरणामुळे हगवणे कुटुंबाचा चेहरा सर्वांसमोर आला. हगवणे कुटुंबाने फक्त वैष्णवीच नाही, तर त्यांच्या थोरल्या सुनेचा मयुरी हगवणेचा छळ केला होता. तिने या प्रकरण पोलीस स्थानकामध्ये तक्रार देखील केली होती. वैष्णवीच्या मृत्यूनंतर मयुरीने हगवणे कुटुंबावर अनेक गंभीर आरोप केले होते.

सासरी होणाऱ्या त्रासाला कंटाळून मयुरी हगवणे तिच्या माहेरी राहायला गेली. सासरकडच्या छळाबद्दल तिने महिला आयोगाकडे तक्रार केली होती. राज्य महिला आयोगाने मयुरी हगवणे प्रकरणात पोलिसांकडून करण्यात आलेल्या कारवाईचा अहवाल सादर करण्याचे निर्देश दिले होते. त्यानुसार आज पोलीस अधीक्षक, पुणे ग्रामीण यांनी अहवाल सादर करत पोलीस तपासाची माहिती दिली आहे.

आवश्यक पोलिस तपासानंतर महिला अत्याचारासंबंधीच्या या प्रकरणी गुन्ह्याची निर्गती ६० दिवसात होणे अपेक्षित असताना दोषारोपपत्र विहित मुदतीत न्यायालयात सादर करण्यात आले नसल्याची गंभीर बाब अहवालात निदर्शनास आली आहे. दोषारोप पत्र दाखल करण्यात आलेल्या विलंबाची गृह विभागामार्फत चौकशी करण्यात यावी अशी मागणी राज्याचे मुख्यमंत्री देवेंद्र फडणवीस यांच्याकडे करण्यात आली आहे.

आज (२८ मे) वैष्णवी हगवणे मृत्यू प्रकरणात हगवणे कुटुंबियांना न्यायालयासमोर हजर करण्यात आले. हगवणेंच्या वकिलाने युक्तिवाद केला. न्यायालयाने वैष्णवीचा नवरा, सासू, नणंद यांना एका दिवसाची, तर वैष्णवीचा सासरा आणि दीर यांना ३१ मे पर्यंत पोलीस कोठडी सुनावली आहे. या दरम्यान हगवणेंच्या वकिलांनी केलेल्या युक्तिवादाची चर्चा पाहायला मिळत आहे.