Ulhasnagar : "तेरे को पहले ही बोला..." भररस्त्यात तरुणावर चाकूने सपासप वार, उल्हासनगरमध्ये खळबळ

अजय दुधाने, उल्हासनगर

उल्हासनगरमध्ये जुन्या वादातून एका तरुणावर दोन अज्ञात व्यक्तींनी दगड आणि चाकूने जीवघेणा हल्ला केल्याची धक्कादायक घटना घडली आहे. ही सर्व घटना सीसीटीव्ही कॅमेऱ्यात कैद झाली आहे .या प्रकरणी पोलिसांनी गुन्हा दाखल करून आरोपींचा शोध सुरू केला आहे.

मिळालेल्या माहितीनुसार, रोशन माखिजा हे गुरुवारी दुपारी सुमारे ४ वाजण्याच्या सुमारास त्यांच्या मित्र समाधान उत्तम बागुल यांना भेटण्यासाठी अंबिका अपार्टमेंट आणि सेवन स्टार बिल्डिंगमधील गल्लीत उभे होते. त्यावेळी दोन अज्ञात व्यक्ती अचानक तेथे आले आणि त्यांनी माखिजा यांच्यावर हल्ला केला.

हल्लेखोरांनी “तेरे को पहले ही बोला था ना कि अमित भाई के साथ जो कुछ भी है वो खतम कर… तू पिछली बार बच गया, इस बार नही बचेगा” अशी धमकी देत अमित वाधवासोबत असलेल्या जुन्या वादाच्या कारणावरून हल्ला केला. त्यातील एका आरोपीने हातातील दगडाने माखिजा यांच्या डोक्यावर हल्ला केला.

दरम्यान, जखमी अवस्थेत माखिजा तेथून पळून जाण्याचा प्रयत्न करत असताना दुसऱ्या आरोपीने त्याच्या हातातील चाकूने त्यांच्या पाठीवर वार करून जिवे मारण्याचा प्रयत्न केला.या घटनेत माखिजा जखमी झाले असून त्यांना उपचारासाठी रुग्णालयात दाखल करण्यात आले आहे. या प्रकरणी पोलिसांनी दोन अज्ञात आरोपींविरुद्ध जीवघेणा हल्ला केल्याप्रकरणी गुन्हा दाखल केला असून पुढील तपास सुरू आहे.