Ulhasnagar Politics : भाजप-शिंदेसेनेत पुन्हा संघर्ष; उल्हासनगरच्या राजकारणाला कलाटणी?

BJP Shinde Sena dispute in Ulhasnagar politics : स्वीकृत नगरसेवकांच्या निवडणुकीवरून उल्हासनगरमध्ये शिवसेना (शिंदे गट) आणि भाजपमधील राजकीय संघर्ष चांगलंच पेटलं आहे. महापौरांनी स्वीकृत नगरसेवक पदासाठीची निवडणूक अनिश्चित काळासाठी स्थगित करण्याचा निर्णय घेतला. त्याला भाजपने विरोध दर्शवला. भाजपचे शहराध्यक्ष राजेश वधारिया यांनी मुंबई उच्च न्यायालयात धाव घेतली होती. भाजपने दाखल केलेल्या याचिकेवर अवघ्या दोन दिवसांत न्यायालयात सुनावणी झाली.

उच्च न्यायालयाने स्वीकृत नगरसेवकांची निवडणूक 15 दिवसांच्या आत घेण्याचे आदेश दिले आहेत. न्यायालयाच्या या आदेशामुळे भाजपला मोठा दिलासा मिळाला आहे. शिंदेंच्या शिवसेनेला हा मोठा राजकीय धक्का मानला जात आहे. उच्च न्यायालयाच्या आदेशानंतर भाजपच्या कार्यकर्त्यांनी पेढे वाटून जल्लोष केला. भाजप शहराध्यक्ष राजेश वधारिया यांनी न्यायालयाने आम्हाला न्याय दिला आहे. हा सत्याचा विजय आहे, अशी प्रतिक्रिया दिली. सत्य हे शेवटी सत्यच असतं, अशी प्रतिक्रिया भाजपचे आमदार कुमार आयलानी यांनी दिली.

महापालिकेतील स्वीकृत नगरसेवक निवडणुकीच्या निमित्ताने शिवसेना-भाजप युतीतील अंतर्गत मतभेद पुन्हा एकदा चव्हाट्यावर आले आहेत. राजकीय समीकरणांच्या दृष्टीने सध्याच्या घडामोडींना महत्व प्राप्त झाले असून, आगामी काळात नेमकं काय होणार आहे, याकडे सगळ्यांचे लक्ष लागले आहे.