Hemraj Shah : मोठी बातमी! ठाकरेसेनेच्या नेत्याचे मुंबईत निधन, राजकीय वर्तुळात शोककळा

राजकीय क्षेत्रातून एक मोठी बातमी समोर आली आहे. ठाकरेसेनेचे नेते तसेच महाराष्ट्र गुजराती समाज महामंडळाचे अध्यक्ष डॉ. हेमराज शाह यांनी वयाच्या ८४ व्या वर्षी अखेरचा श्वास घेतला. त्यांच्या पश्चात अरविंद शाह आणि उदय शाह ही दोन मुले, सुना, नातवंडे असा परिवार आहे. शिवाजी पार्क येथे त्यांच्या पार्थिवावर अंत्यसंस्कार करण्यात आले.दरम्यान त्यांच्या जाण्याने कुटुंबासह राजकीय क्षेत्रावर दुःखाचा डोंगर कोसळला आहे.

समाजकारण, पत्रकारिता, साहित्य आणि सांस्कृतिक क्षेत्रात दीर्घकाळ निःस्वार्थपणे कार्य करणारे बहुआयामी व्यक्तिमत्त्व म्हणून डॉ. शाह यांची ओळख होती. मुंबईसह महाराष्ट्रातील गुजराती समाजाला एकत्र आणण्यासाठी त्यांनी सातत्याने प्रयत्न केले. बृहन्मुंबई गुजराती समाजाच्या माध्यमातून त्यांनी तब्बल १३९ गुजराती संस्थांचे फेडरेशन उभारले. या संस्थांच्या विविध समस्या सोडवण्यासाठी त्यांनी सक्रिय भूमिका बजावली. ‘कच्छ-शक्ती’ या वार्षिकाचे संपादक म्हणून त्यांनी कच्छी आणि गुजराती समाजातील सामाजिक, सांस्कृतिक उपक्रमांना व्यासपीठ मिळवून दिले. गुजराती भाषा, साहित्य आणि राजकारण या विषयांवर त्यांनी लेखन केले. त्यांनी गुजराती भाषेत १९, मराठीत ८ आणि इंग्रजीत २ पुस्तकांचे अनुवाद केले, तर गुजरातीतील ३२ आणि मराठीतील ४ पुस्तके संपादित केली.

महाराष्ट्र गुजराती समाज महामंडळाच्या स्थापनेपासून तब्बल ३५ वर्षे त्यांनी अध्यक्षपदाची धुरा सांभाळली. जोगेश्वरी (पश्चिम) येथे त्यांच्या पुढाकारातून सात मजली नवनीत गुजराती समाज भवनाची उभारणी झाली. या भवनात त्यांच्या कार्याची आठवण जपणारे डॉ. हेमराज शाह स्मृती संग्रहालयही स्थापन करण्यात आले आहे. तसेच शिर्डीच्या साईबाबा संस्थानाचे विश्वस्त आणि महाराष्ट्र राज्य गुजराती साहित्य अकादमीचे कार्यकारी अध्यक्ष म्हणूनही त्यांनी जबाबदारी पार पाडली. विश्व गुजराती समाज, द बुक मॅन्युफॅक्चरर्स असोसिएशन, कच्छ-शक्ती, उमरगाव गोशाळा आणि श्री वागड वीसा ओसवाल विकास समाज अशा विविध संस्थांमध्ये त्यांनी महत्त्वपूर्ण योगदान दिले.

महाराष्ट्रातील इतर मागासवर्गीय प्रवर्गात दहा विविध जातींचा समावेश करण्यासाठीही त्यांनी सातत्याने पाठपुरावा केला. स्तंभलेखक आणि संपादक म्हणून त्यांनी पत्रकारितेतही आपला ठसा उमटवला. सामाजिक आणि साहित्यिक क्षेत्रातील योगदानाबद्दल त्यांना विविध पुरस्कारांनी गौरवण्यात आले होते. त्यांच्या निधनाने महाराष्ट्रातील गुजराती समाजासह सामाजिक, राजकीय,साहित्यिक आणि सांस्कृतिक क्षेत्रात मोठी पोकळी निर्माण झाली आहे.