Thane: शाळा बंद, ऑनलाइन अभ्यास सुरू; ठाण्यातील नामांकित शाळेचा निर्णय, नेमकं कारण काय?

ठाणे शहरातील श्रीमती सुनीतीदेवी सिंघानिया या शाळेमध्ये विद्यार्थी आणि शिक्षकांमध्ये डासांमुळे होणाऱ्या आजारांचे काही संशयास्पद प्रकार समोर आल्यानंतर शाळा व्यवस्थापनाने एक निर्णय घेतला आहे. १८ जून ते २८ जून या कालावधीत नर्सरी ते १० वी पर्यंतचे वर्ग ऑनलाइन पद्धतीने घेण्याचा निर्णय घेण्यात आला आहे. कॅम्पस आणि परिसरातील साचलेल्या पाण्यात डासांचे प्रमाण वाढत आहे. यामुळे विद्यार्थी आणि शिक्षकांना मलेरिया आणि डेंग्यूची लागण होण्याची शक्यता आहे. त्यामुळे शाळा व्यवस्थापनाने हा निर्णय घेतला आहे.

शाळा व्यवस्थापनाने स्पष्ट केलं की, मोठ्या प्रमाणात डेंग्यूचे रुग्ण आढळल्याचं वृत्त पूर्णपणे निराधार आहे. 'आम्ही ठाणे महानगरपालिकेच्या आरोग्य विभागाने शिफारस केलेल्या खबरदारीच्या उपाययोजनांचा अवलंब केला आहे.' ठाणे महानगरपालिकेच्या आरोग्य विभागाने शाळेची पाहणी केली असून, परिसरात डासांची पैदास झाल्याचे ठोस पुरावे सापडले नसल्याचे महापालिकेच्या अधिकाऱ्यांनी सांगितले.

शाळेच्या प्रतिनिधींनी सांगितले की, 'खबरदारीचा उपाय म्हणून शाळेच्या संपूर्ण आवारात औषध फवारणी करण्यात आली असून, सर्व खिडक्यांवर मच्छरदाण्या बसवण्यात आल्या आहेत. आम्ही २८ जूनपर्यंत सर्व विद्यार्थ्यांचे वर्ग ऑनलाइन पद्धतीने घेणार आहोत. पाचवीच्या परीक्षा रद्द करण्यात आल्या आहेत. सहावी आणि दहावीच्या युनिट चाचण्या पुन्हा घेण्यात येणार आहे', असं अधिकाऱ्यांनी स्पष्ट केलं.

महानगरपालिकेचे आरोग्य अधिकारी डॉ. प्रसाद पाटील यांनी सांगितले की, पालकांच्या तक्रारीनंतर सोमवारी आरोग्य विभागाचे पथक शाळेत गेले आणि भांडी, फाटलेले टायर, जुनं फर्निचर यांसारख्या डास पैदास करणाऱ्या ठिकाणांची सफाई करण्यात आली आहे.