Malshej Ghat : माळशेज घाटाजवळ एसटी बसचा भीषण अपघात, ३ जणांचा जागीच मृत्यू, ५ जखमी

फय्याज शेख, साम टीव्ही प्रतिनिधी

Murbad ST bus Scorpio accident latest update : मुरबाड-माळशेज घाट महामार्गावरील वैशाखरे वळणावर आज काळजाचा ठोका चुकवणारा अपघात झाला. एसटी बस आणि स्कॉर्पिओ कारची समोरासमोर जोरदार धडक झाली. या भीषण अपघातात ३ जणांचा जागीच मृत्यू झाला आहे. मृतांमध्ये २ पुरुष आणि एका महिलेचा समावेश आहे. तर एका लहान मुलासह पाच जण गंभीर जखमी झाले आहेत. त्यांच्यावर जवळच्या सरकारी रूग्णालयात उपचार सुरू आहे. जखमींची प्रकृती गंभीर असल्याने मृतांचा आकडा वाढण्याची भीती व्यक्त होत आहे.

कल्याण-अहिल्यानगर महामार्गावर वैशाखरे वळणाजवळ ओव्हरटेक करण्याच्या नादात हा अपघात झाल्याची प्राथमिक माहिती मिळत आहे. जखमींना तात्काळ उपचारासाठी टोकावडे येथील ग्रामीण रुग्णालयात दाखल करण्यात आले आहे. घटनेची माहिती मिळताच टोकावडे महामार्ग पोलिसांनी घटनास्थळी धाव घेतली. पोलिसांनी तात्काळ अपघातग्रस्त वाहनांना बाजूला करून वाहतूक सुरळीत केली. पोलिसांनी या प्रकरणी गुन्हा दाखल केला असून पुढील तपास करण्यात येत आहे.

आज सकाळी कल्याणहून अहिल्यानगरच्या दिशेने जाणारी एसटी बस वैशाखरे येथील वळणावर आली होती. त्याचवेळी समोरून येणाऱ्या स्कार्पिओसोबत बसची जोरदार धडक झाली. ही धडक इतकी भीषण होती की, दोन्ही वाहनांच्या पुढील भागाचा चुराडा झाला. या अपघातात स्कार्पिओमधील एका पुरुषाचा आणि महिलेचा जागीच मृत्यू झाला. तर एकाचा उपचारावेळी मृत्यू झाला.

या अपघातात एका लहान मुलासह पाच जण जखमी झाले आहेत. अपघातानंतर स्थानिक नागरिकांनी तातडीने मदतीसाठी धाव घेत जखमींना गाडीबाहेर काढले. सर्व जखमींना उपचारासाठी टोकवडा येथील ग्रामीण रुग्णालयात दाखल करण्यात आले आहे. या अपघातामुळे कल्याण-नगर महामार्गावरील वाहतूक काही काळ विस्कळीत झाली होती. पोलिसांनी घटनास्थळी धाव घेत वाहतूक सुरळीत केली. जखमींवर सध्या उपचार सुरू आहेत, दोन जणांची प्रकृती गंभीर असल्याचे सांगितले जात आहे.