मोहित कंबोज यांच्या गाडीवरील हल्ल्यानंतर तेजस ठाकरेंकडून शिवसैनिकांची विचारपूस

मुंबई - भाजप नेते मोहित कंबोज (Mohit Kamboj) यांच्या कारवर 'मातोश्री' परिसरात कलानगरच्या सिग्नलवर जमावानं हल्ला केल्याची घटना रात्री घडली. हा हल्ला शिवसैनिकांनी केल्याचा आरोप होत आहे. भाजप नेते मोहित कंबोज यांच्या गाडीवर हल्ला झाल्यानंतर तेजस ठाकरे (Tejas Thackeray) यांनी मातोश्रीबाहेर येऊन शिवसैनिकांची विचारपूस केली. यावेळी त्यांनी शिवसैनिकांशी मोकळेपणाने संवाद साधला.

हे देखील पहा -

ठाकरे कुटुंबातील व्यक्तींची भेट ही शिवसैनिकांचा उत्साह वाढवणारी ठरू शकते. काल संध्याकाळी मुख्यमंत्री उद्धव ठाकरे यांनी देखील शिवसैनिकांशी संवाद साधला होता. या सगळ्यामुळे शिवसैनिकांमध्ये नवी उर्जा आली आहे.

मोहित कंबोज यांच्या गाडीवर शुक्रवारी रात्री मातोश्रीबाहेर कलानगरच्या सिग्नलवर हल्ला झाला. त्यानंतर एकच गोंधळ झाला. मातोश्रीबाहेर हनुमान चालीसा पठण करण्याचा इशारा राणा दाम्पत्याने दिल्यानंतर राज्यातील शिवसैनिक चांगलेच आक्रमक झाल्याचे पाहायला मिळत आहे. हनुमान चालीसा पठण करण्याच्या राणा दाम्पत्यांच्या इशाऱ्यानंतर कंबोज यांच्याकडून मातोश्रीची रेकी केल्याचा आरोप शिवसैनिकांकडून करण्यात आला आहे.

दरम्यान, राणा दाम्पत्याने आज सकाळी ९ वाजता मातोश्रीवर पोहोचू, असे सांगितले आहे. त्यामुळे आज मुंबईत राणा दाम्पत्य विरुद्ध शिवसेना असा हायव्होल्टेज ड्रामा रंगण्याची शक्यता आहे.