Lonavala Pune Local Train : लोणावळा ते पुणे लोहमार्गावर दुपारी पाऊण ते एक वाजण्याच्या दरम्यान लोणावळा ते पुणे अशी लोकल (local train) सुरु करा अशी मागणी करण्यात आली आहे. ही मागणी पिंपरी-चिंचवड रेल्वे प्रवासी संघाचे अध्यक्ष इक्बाल मुलाणी यांनी मध्य रेल्वेचे महाप्रबंधक अनिलकुमार लाहोटी यांच्याकडे केली आहे. या मागणीचा विचार झाला पाहिजे असे विविध शाळेतील शिक्षक, पालकांचं देखील मत आहे.
लोणावळा शहरातील सकाळच्या शाळा दुपारी 12:15 वाजता सुटतात. लोणावळा परिसरात जवळपास 13 ते 14 प्राथमिक शाळा (schools), विद्यालये, महाविद्यालये आहेत. त्याच प्रमाणे विद्यार्थ्यांची संख्याही मोठी आहे. ग्रामीण भागातील बहुतांश विद्यार्थी हे लोकलने प्रवास करत असतात. सर्व विद्यार्थी मळवली, कामशेत कान्हे, वडगांव, तळेगांव, देहुरोड, आकुर्डीसह मावळ (maval) तालुक्यातील दुर्गम भागातून शिक्षणासाठी येत असतात.
काही शिक्षक देखील देहूरोड, कासारवाडी तसेच पुण्याहून शाळेत येतात.या सर्वांना सकाळी लोकल उपलब्ध आहे मात्र काही शाळा दुपारी सुटल्यानंतर पुण्याकडे जाणारी लोकल थेट 02:50 ला आहे. जवळपास 2 तास 45 मिनिटं या विद्यार्थांना रेल्वे स्थानकावर बसून रहावे लागते.
मुलांच्या अभ्यासातील हा वेळ वाया जातो. यामुळे प्रवासाला कंटाळून मुलांचे शाळेतील गैरहजेरीचे प्रमाणही वाढत आहे. शालेय विद्यार्थ्यांची होणारी ही गैरसोय दूर करण्यासाठी या मागणीचा सकारात्मक विचार करत लोणावळा स्थानकावरून पुण्याकडे जाण्यासाठी लोकल सुरु करावी अशी मागणी पिंपरी-चिंचवड रेल्वे प्रवासी संघटना यांनी रेल्वे प्रशासनास केली आहे.
Edited By : Siddharth Latkar
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.