Accident : दुर्दैवी! दहावीच्या विद्यार्थ्यांचा मृत्यू, हॉल तिकीट आणायला गेला अन् काळाने घाला घातला

Navi Mumbai Accident : नवी मुंबईमध्ये दुर्दैवी घटना घडली आहे. दहावीच्या विद्यार्थ्याचा अपघातात मृत्यू झालाय. हॉल तिकिटाचे प्रिंट आऊट आणायला गेल्यानंतर काळाने घाला घातला. सायकलवर मित्रासोबत दहावीचे हॉल तिकिटाचे प्रिंट आऊट आणायला गेल्यानंतर डंपरने धडक दिली, त्यामुळे दहावीच्या विद्यार्त्याचा जागीच मृत्यू झालाय. दिपांशु बौद्धची (१५) असे विद्यार्थ्याचे नाव आहे. तुर्भे नाका येथे अपघात झाला, अपघातानंतर डंपर चालक पसार झाला.

आजपासून राज्यात दहावीच्या परीक्षेला सुरूवात झाली आहे. पण त्याआधीच नवी मुंबईत दुर्दैवी घटना घडली आहे. नवी मुंबईतील तुर्भे नाका येथे डंपरच्या धडकेत दहावीच्या विद्यार्थ्याचा मृत्यू जाला आहे. मित्रासोबत सायकलने दहावीच्या हॉल तिकीटचे प्रिंटआऊट काढायला जात असताना अपघात झाला.

डंपर चालकाने भरधाव वेगाने डंपर चालवत सायकलला मागून धडक दिल्याने अपघात झाला. अपघातात दहावीचा विद्यार्थी दिपांशू बौद्ध याचा दुर्दैवी मृत्यू झाला. अपघातानंतर डंपर चालक फरार झाला होता. पण तुर्भे एमआयडीसी पोलिसांनी डम्पर चालकाला ताब्यात घेतले. डंपर चालका विरोधात तुर्भे पोलीस ठाण्यात गुन्हा दाखल करण्यात आला आहे.

तुर्भे एमआयडीसीतील इंदिरा नगरमध्ये राहणारा दिपांशु बौद्धची (१५) शुक्रवारपासून दहावीच्या बोर्डाची परीक्षा सुरु होणार होती. इंदिरानगर येथून हॉल तिकिटाचे प्रिंटआऊट काढण्यासाठी दिपांशु सायकलवर तुर्भे नाका येथे जात होता. त्याचा मित्र अल्ताफही त्याच्यासोबत होता. फायजर रोडवरून जाताना अमित पॅलेस बारसमोर पाठीमागून भरधाव आलेल्या डम्परने त्याला धडक दिली. गंभीर जखमी असलेल्या यात दिपांशुला खासगी रुग्णालयात दाखल करण्यात आले. पण रात्री उशिरा त्याचा मृत्यू झाला.