Snake Hidden in Scooter : स्कूटरच्या इंजिनमध्ये लपाला साप; चालकाचं लक्ष गेलं अन्... वाचा पुढे काय घडलं?

पावसाळ्यात बिळात पाणी जमा झाल्याने बरेचसे साप हे मानवी वस्तीत फिरताना आढळतात. ते कोरड्या आणि सेफ जागेच्या शोधात आपल्या बिळातून बाहेर पडतात. आता मानवी वस्तीत साप कुठे आपलं घर करतील आणि कुठे नाही हे सांगणं कठीणच आहे. असाच एक साप चक्क स्कुटरच्या इंजिनमध्ये जाऊन बसल्याची माहिती समोर आली आहे.

साप स्कूटरच्या इंजिनमध्ये लपून बसला होता. स्कुटरवर होत असलेली हालचाल पाहून मालकाला लगेच इथे साप असल्याचा संशय आला. त्यावर स्कुटरच्या मालकाने पॉज संस्थेला फोन करून याबाबत माहिती दिली. पॉज संस्थेचे स्वयंसेवक ऋषिकेश सुरसे यांनी घटनास्थळी धाव घेत या सापाला स्कुटरमधून सुखरुप बाहेर काढले आणि त्याचे प्राण वाचवले. त्यानंतर त्या सापाला निसर्ग अधिवासात सोडून दिले आहे.

स्कुटरमध्ये लपलेला साप 1 फूट लांबीचा आहे. डुरक्या घोंणस जातीचा हा साप पूर्णपणे बिन विषारी असून तो खूप सुस्त असतो. ठाणे जिल्ह्यातील परिसरात या सापाचं वास्तव्य नेहमीच असतं. साप चपळ आणि विषारी नसल्याने त्याचा आपल्याला कोणताही धोका नसतो असे पॉज संस्थेचे निलेश भणगे यांनी सांगितले आहे.

दरवर्षी पॉज संस्था शेकडो वन्यजीवांच्या मदतीला धावून जाते आणि गेल्या २४ वर्षांत संस्थेने हजारो वन्यजीव पुनर्वसित केले आहेत. संस्थेच्या 9820161114 या हेल्पलाईनवर कॉल आपण कॉल करू शकता.

सोशल मीडियावर पावसाळ्यात विविध ठिकाणी साप सापडल्याचे अनेक व्हिडिओ व्हायरल होतात. या आधी देखील स्कूटर किंवा बाईकमध्ये साप लपल्याच्या घटना घडल्या आहेत. त्यासह व्यक्तींच्या श्यूजमध्ये देखील साप लपून बसल्याचे व्हिडिओ सोशल मीडियावर व्हायरल झालेत.