मीरा गावठाण बस स्टॉपवर तरुणीची छेडछाड झाल्याचा आरोप
आरोपीचा अश्लील प्रकार सीसीटीव्ही कॅमेऱ्यात कैद झाला
संतप्त नागरिक आणि शिवसेना पदाधिकाऱ्यांनी आरोपीला जाब विचारला
महिलांच्या सुरक्षेचा मुद्दा पुन्हा एकदा चर्चेत आला आहे
मनोज तांबे, मुंबई
भाईंदरच्या मीरा गावठाण परिसरात बस स्टॉपवर घडलेल्या एका धक्कादायक प्रकारामुळे परिसरात खळबळ उडाली आहे. एका तरुणाने तरुणीची छेडछाड करण्याचा प्रयत्न केल्याची घटना समोर आली असून, हा संपूर्ण प्रकार जवळील हॉटेलच्या सीसीटीव्ही कॅमेऱ्यात स्पष्टपणे कैद झाला आहे.
मिळालेल्या माहितीनुसार, संबंधित तरुण बस स्टॉपजवळ उभ्या असलेल्या तरुणीच्या दिशेने अश्लील हावभाव करत होता. त्याने तरुणीकडे लज्जास्पद शब्दांत “तुझा रेट काय?” अशी विचारणा केल्याचा आरोप आहे. या प्रकारामुळे तरुणी प्रचंड घाबरली आणि स्वतःचा बचाव करण्यासाठी तिने तत्काळ जवळील हॉटेलमध्ये धाव घेतली. अचानक घडलेल्या या घटनेमुळे परिसरात काही वेळ तणावाचे वातावरण निर्माण झाले.
घटनेची माहिती मिळताच शिवसेना शाखाप्रमुख अजय साळवे यांनी घटनास्थळी धाव घेतली. त्यांनी संबंधित तरुणाला जाब विचारत संताप व्यक्त केला. उपस्थित नागरिकांच्या समोरच त्यांनी त्या तरुणाला चांगलाच चोप दिला तसेच त्याला उठाबशा काढण्यास भाग पाडले. या कारवाईनंतर परिसरातील नागरिकांनीही समाधान व्यक्त केले.
अनेकांनी आरोपीविरुद्ध कठोर कारवाईची मागणी केली आहे. स्थानिक नागरिकांनीही परिसरातील बस स्टॉप व सार्वजनिक ठिकाणी महिलांच्या सुरक्षिततेबाबत चिंता व्यक्त केली आहे. मीरा भाईंदर शहरात महिलांच्या सुरक्षेचा प्रश्न पुन्हा एकदा ऐरणीवर आला असून, अशा घटनांना आळा घालण्यासाठी अधिक कठोर उपाययोजना करण्याची मागणी जोर धरू लागली आहे. पोलिस प्रशासनाने या प्रकरणाची दखल घेऊन पुढील तपास सुरू केला आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.