मुंबईत पहाटे रक्तरंजित थरार; नारळ विक्रेत्यावर चाकू हल्ला, हत्येमागचं कारण काय?

गोवंडीतील शिवाजी नगर परिसरातून एक धक्कादायक बातमी समोर येत आहे. आंबेडकर गार्डन परिसरात नारळ पाणी विक्रेत्याची चाकूने निर्घृण हत्या करण्यात आली. ही धक्कादायक घटना ३० ऑक्टोबर रोजी उघडकीस आली. आरोपी तरूणानं नशेसाठी पैसे मिळवण्यासाठी नारळ पाणी विक्रेत्याची हत्या केली. या हल्ल्यात पीडित व्यक्तीचा जागीच मृत्यू झाला. सध्या पोलिसांकडून अधिक तपास सुरू आहे.

मिळालेल्या माहितीनुसार, मृत व्यक्तीचे नाव मीर कासिम असून, तो आंबेडकर गार्डन परिसरात नारळ पाणी विकायचा. तर, साजिद कुरेशी (वय वर्ष २०) असे आरोपीचे नाव आहे. आरोपी हा त्याच परिसरातील आहेत. या तरूणानं नशेसाठी पैसे मिळवण्यासाठी मीर कासिमवर चाकूने हल्ला केला.

या हल्ल्यात कासिमचा जागीच मृत्यू झाला. या घटनेची माहिती मिळताच पोलिसांनी घटनास्थळी धाव घेतली. तसेच तपासाला सुरूवात केली. पोलिसांनी मृतदेह ताब्यात घेऊन शवविच्छेदनासाठी रूग्णालयात पाठवलं. पोलिसांनी परिसरातील सीसीटीव्ही फुटेज तपासले. सीसीटीव्ही फुटेजमध्ये आरोपीची ओळख पटली.

पोलिसांनी तपासाची चक्रे फिरवून केवळ ५ तासांत साजिद कुरेशीला अटक केली. या घटनेनंतर मीर कासिमच्या कुटुंबियांवर दुखा:चा डोंगर कोसळला आहे. या प्रकरणी पोलिसांकडून पुढील तपास सुरू आहे. या घटनेनंतर परिसरात खळबळ उडाली आहे.